«Сифат фарма» дар Душанбе нуқтаҳои фурӯши доруворӣ боз намуд

ДУШАНБЕ, 30.09.2017./АМИТ «Ховар»/. Дар  Душанбе  маросими расмии оғози фаъолияти Ҷамъияти дорои масъулияти маҳдуди “Сифат фарма” баргузор гардид. Дар ин бора ба АМИТ «Ховар» аз Вазорати тандурустӣ ва ҳифзи иҷтимоии аҳолии ҶТ хабар доданд.

Дар расми ифтитоҳи фаъолияти расмии ҶДММ “Сифат фарма”  муовини якуми Вазири тандурустӣ ва ҳифзи иҷтимоии аҳолии Ҷумҳурии Тоҷикистон Саида  Умарзода, муовини Вазири тандурустии Ҷумҳурии Белоруссия Валерий Шепчук,  намояндагони соҳаҳои тандурустиву дорусозии Тоҷикистон, Белоруссия, Ҳиндустон ва  Эрон иштирок намуданд.

Дар расми ифтитоҳи  ҶДММ “Сифат фарма”  хабар дода шуд, ки ширкати мазкур бо мақсади таъмини аҳолӣ бо дорувории хушсифат ва ба стандартҳои байналмиллалӣ ҷавобгӯ, инчунин аз ҷиҳати иқтисодӣ дастрас   таъсис ёфтааст.

Саида Умарзода зимни суханронии хеш  зикр намуд: “Туфайли сиёсати хирадмандонаи Ҳукумати Ҷумҳурии Тоҷикистон дар самти ҳифзи сиҳатии аҳолии мамлакат  ҳамасола дар кишвар даҳҳо марказҳои саломативу бунгоҳҳои тиббӣ ва иншооти дигари соҳаи тандурустӣ бунёд ёфта,  мавриди истифода қарор мегиранд. Чунин иқдом ва ғамхории Ҳукумати мамлакат боис гардидааст, ки   соҳаи тандурустии кишвар ба дастовардҳои назарраси илмиву амалӣ комёб гардад”.

Ҳамзамон Саида  Умарзода иброз дошт, ки чун солҳои қаблӣ соли 2017 низ дар ҷумҳурӣ иншооти зиёди марбут ба соҳаи тандурустӣ мавриди истифода қарор гирифтанд, ки   ҶДММ “Сифат фарма” аз ҷумлаи онҳо буда, дар самти таъмини аҳолӣ бо дорувории хушсифат,    дар пешрафти соҳаи дорусозиву дорифурӯшии   кишвар нақши назаррас хоҳад дошт.

Хотиррасон менамоем,  ки ҶДММ “Сифат фарма” бо мақсади дастраси аҳолии Тоҷикистон намудани дорувории ба стандартҳои ҷаҳонӣ мутобиқаткунанда бо вазоратҳои тандурустиву соҳаҳои дорусозии кишварҳои Белоруссия, Ҳиндустон ва Эрон шартномаи ҳамкорӣ баста, нақша дорад дар оянда сафи  шариконро бештар намояд.