ДАР БАДАХШОН ҚОНУНИ ТАНЗИМРО ҶОНИБДОРӢ ВА РИОЯ МЕНАМОЯНД. Абдураҳмон Аламшозода дар Хоруғ ҷаласаи Ситоди байниидоравӣ доир кард

ДУШАНБЕ, 04.10.2017 /АМИТ «Ховар»/. Дар толори Раёсати Вазорати корҳои дохилии  Ҷумҳурии Тоҷикистон дар Вилояти Мухтори Кӯҳистони Бадахшон дар назди муовини якуми Вазири корҳои дохилии Ҷумҳурии Тоҷикистон генерал-майори милитсия  Абдураҳмон Аламшозода бо иштироки  узви Маҷлиси миллии Маҷлиси Олии Ҷумҳурии Тоҷикистон, раиси ВМКБ Шодихон Ҷамшед ҷаласаи Ситоди байниидоравӣ баргузор гардид. Дар ин бора аз Вазорати корҳои дохилӣ хабар доданд.

Тавре иттилоъ дода шуд, дар ҷаласаи Ситоди байниидоравӣ оид ба таъмини амният ва тартиботи ҳуқуқӣ роҳбарони раёсатҳои Кумитаи давлатии амнияти миллӣ, Вазорати мудофиа, Агентии назорати маводи нашъаовари назди Президенти Ҷумҳурии Тоҷикистон, Агентии назорати давлатии молиявӣ ва мубориза бо коррупсия, Вазорати адлия, Гвардияи миллӣ, Кумитаи андоз, Кумитаи ҳолатҳои фавқулода ва мудофиаи граждании Ҷумҳурии Тоҷикистон дар ВМКБ ва дигар шахсони расмӣ иштирок доштанд.

Дар ҷараёни ҷаласа роҳбарони Ситоди байниидоравӣ дар вилояти мазкур иброз доштанд, ки тағйиру иловаҳо ба Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон», «Кодекси ҳуқуқвайронкунии маъмурии Ҷумҳурии Тоҷикистон» ва «Кодекси ҷиноятии Ҷумҳурии Тоҷикистон» дар байни аҳолӣ хуб пазируфта шуда, сокинони Вилояти Мухтори Кӯҳистони Бадахшон онҳоро ҳамаҷониба ҷонибдорӣ ва риоя менамоянд.

Дар ҷаласаи Ситоди байниидоравӣ муовини якуми Вазири корҳои дохилӣ сатҳи ҷинояткориро дар ВМКБ мавриди баррасӣ қарор дода, баҳри таъмини суботу оромӣ дар вилоят, амнияти шаҳрвандон, инчунин пешгирии ҷинояткорӣ дастуру супоришҳои роҳбари Ситоди байниидоравии ҷумҳуриявӣ оид ба таъмини амният ва тартиботи ҳуқуқӣ, Вазири корҳои дохилӣ Рамазон Раҳимзодаро ба ҳозирин расонид.

Ҳамчунин Абдураҳмон Аламшозода ба иштирокдорони ҷаласа оид ба волоияти қонун, сулҳу суботи кишвар, ҳифзи сарҳади давлатии Ҷумҳурии Тоҷикистон, мубориза бо ҷинояткорӣ, пешгирии гардиши ғайриқонунии маводи мухаддир, ба танзим даровардани ҳаракати воситаҳои нақлиёт дар ҳудуди роҳҳои вилоят, аз ҷумла воситаҳои нақлиёти берақами қайди давлатӣ, сиёҳшишаи ғайриқонунӣ, бе шаҳодатномаи ронандагӣ, дар ҳолати мастӣ, бо рақамҳои қайди дигар давлатҳо ва тронзитӣ сухан гуфта, ба аъзои Ситоди байниидоравии вилоят баҳри беҳтар намудани фаъолияти самтҳои корӣ дастуру супоришҳои мушаххас дод.

Ба зикри манбаъ дар хотимаи ҷаласа барои боз ҳам тақвият бахшидан ба фаъолияти Ситоди байниидоравӣ дар ВМКБ аз ҷониби роҳбарони раёсатҳои вазорату идораҳои дахлдор таклифу пешниҳодҳои судманд баён гардиданд.