«Нақши Пешвои миллат дар беҳдошти ҳаёту рӯзгори занон»- ҳамоиш дар Нуробод

НУРОБОД, 17.11.2017 /АМИТ «Ховар»/. Дар  ноҳияи Нуробод бахшида ба 25- солагии Иҷлосияи 16-уми Шӯрои Олии Ҷумҳурии Тоҷикистон байни занону бонувони ноҳия таҳти унвони «Нақши Пешвои миллат дар беҳдошти ҳаёту рӯзгори занон» ҳамоиши илмӣ баргузор шуд. Дар ин бора мудири бахши кор бо занон ва  оилаи ноҳияи Нуробод Шаҳнозаи Шукрихудо ба хабарнигори АМИТ «Ховар» иттилоъ дод.

Дар ҳамоиш зикр гардид, ки дар даврони собиқ шӯравӣ дар ноҳия танҳо 17 нафар занони соҳибмаълумот дар соҳаҳои хоҷагии халқ кор мекарданд. Ҳоло бо дастгирии бевоситаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон шумораи занони роҳбар 16 нафар буда, дар соҳаи маориф 98 нафар, роҳбарони хоҷагиҳои деҳқонӣ 28 нафар, занони соҳибкор 25 нафар  ва дар соҳаи тиб 198 нафар бонувон  фаъолият доранд. Инчунин имрӯзҳо 78 нафар духтарони нурободӣ тибқи квотаҳои президентӣ  дар муассисаҳои олии кишвар таҳсили худро  идома дода истодаанд.

Иштирокчиёни  ҷамъомад  иброз намуданд, ки дастгириву ғамхориҳои Президенти Ҷумҳурии Тоҷикистон муҳтарам Эмомалӣ Раҳмон моро водор менамояд, ки дар оянда низ барои амалӣ гардидани нияту ҳадафҳои созандаи Пешвои миллат содиқона хизмат намоем.