Агентии суғурта: нафақаи пирон дар соли 2017 бозҳисобӣ гардид

ДУШАНБЕ, 29.12.2017 /АМИТ «Ховар»/. Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон иттилоъ медиҳад, ки аз ҷониби Агентӣ ва сохторҳои он дар вилоятҳо ва шаҳру ноҳияҳои ҷумҳурӣ нафақаҳои суғуртавии 20  ҳазору 961 нафар нафақагироне, ки ба онҳо аз 1 январи соли ҷорӣ инҷониб нафақа таъйин гардида буд, бозҳисобӣ карда шуданд, ки аз ин теъдод 18601 нафар – нафақаи суғуртавӣ аз рўи синну сол, 1562 нафар — нафақаи суғуртавӣ аз рўи маъюбӣ, 1293 нафар — нафақаи суғуртавӣ аз рўи маҳрум шудан аз саробон мегиранд.

Ба иттилои манбаъ, дар натиҷа маблағи моҳона ва андозаи миёнаи нафақаи суғуртавии 20 ҳазору 961 нафар нафақагирон 23,2% афзоиш ёфт.

Зикр гардид, ки тартиби такмилёфтаи индексатсияи сармояи шартии нафақавии шахсони суғурташуда, ки дар ҳисоби андозаи қисми суғуртавии нафақаҳои суғуртавӣ таъсири мусбат мерасонад, дар ҳисоби андозаи қисми суғуртавии нафақаҳои суғуртавии шаҳрвандоне, ки ба онҳо минбаъд низ нафақаҳои суғуртавӣ таъйин мегарданд, истифода карда мешавад.