Ҷамъиятҳои истифодабарандагони чарогоҳ дар ноҳияи Данғара бо техника ва мошинолоти кишоварзӣ таъмин гардиданд

ДУШАНБЕ, 28.12.2017 /АМИТ «Ховар»/. Дар заминаи иҷрои дастуру супоришҳои Пешвои миллат муҳтарам Эмомалӣ Раҳмон ҷиҳати бо техника ва мошинолоти кишоварзӣ таъмин намудани аҳолии деҳот ва бо дарназардошти эҳтиёҷоти ҷамъиятҳои истифодабарандагони чарогоҳ дар ноҳияи Данғара имрӯз, 28 декабр  аз ҷониби Муассисаи давлатии Маркази идораи Лоиҳаи «Рушди чорводорӣ ва чарогоҳҳо»  24 адад тракторҳои тамғаи МТЗ, 6 ядак ва 3 комбайни ғалладарав дастрас  гардид.

Дар ин бора намояндаи лоиҳаи мазкур Муҳриддин Музаффаров ба АМИТ «Ховар» хабар дод.

Дар ҳақиқат норасоии техникаи кишоварзӣ барои сари вақт анҷом додани корҳои саҳроӣ мушкилиҳои зиёд ба вуҷуд меорад. Маркази идораи лоиҳа чунин эҳтиёҷотро ба инобат гирифта, дар заминаи марҳилаи дуюми татбиқи лоиҳа дастрасии аҳолиро бо техника таъмин намуд. Мутобиқи нақшаи татбиқи лоиҳа дар назар аст, ки ҷамъиятҳои истифодабарандагони чарогоҳ дар ин ноҳия  боз бо 9 трактор ва 5 ядак (присепи трактор)  таъмин карда шаванд.

Бояд зикр намуд, ки аз ҷониби Маркази идораи Лоиҳаи «Рушди чорводорӣ ва чарогоҳҳо» дар марҳилаи дуюми татбиқи ин лоиҳа дар ноҳияҳои Фархор, Ҳамадонӣ, Восеъ ва деҳоти шаҳри Кӯлоб низ дар маҷмӯъ 90 трактор ва 50 ядак, 3 борбардори фронталӣ, 4 комбайни ғалладарав ва 2 экскаватор дастрас карда шуданд.