Дар ҷумҳурӣ истеҳсоли сабзавот сол аз сол меафзояд

ДУШАНБЕ, 07.12.2017 /АМИТ «Ховар»/. Самаранок истифода бурдани заминҳои корам ва дуруст риоя намудани агратехникаи парвариши зироати кишоварзӣ боис гаштааст, ки ҳосилнокии зироати кишоварзӣ баланд ва маҳсулоти он фаровон гардад. Тавре аз Вазорати кишоварзии Ҷумҳурии Тоҷикистон хабар доданд, то 4 декабри соли равон дар ҷумҳурӣ ҳосили 31 ҳазору 20 га сабзавот ҷамъоварӣ карда шуд, ки нисбат ба ҳамин давраи соли гузашта 882 га зиёд мебошад. Ҳосили умумии ҷамъоваришудаи сабзавот дар ҷумҳурӣ 800 ҳазору 205 тоннаро ташкил дод, ки дар муқоиса ба ҳамин давраи соли гузашта 39 ҳазору 680 тонна зиёд буда, ҳосилнокӣ аз ҳар га 258 сентнерро ташкил медиҳад.

Ба иттилои манбаъ, аз ҳисоби ҳосили умумии сабзавот пиёз 393 ҳазору 505 тонна, карам 22 ҳазору 752 тонна, помидор 144 ҳазору 81 тонна, бодиринг 49 ҳазору 498 тонна, сабзӣ 90 ҳазору 466 тонна ва дигар сабзавот 99 ҳазору 903 тоннаро ташкил дод.

Бояд зикр кард, ки имсол истеҳсоли ҳосили фаровони меваю сабзавот дар ҷумҳурӣ имкон дод, ки дар бозорҳои мамлакат нархи бештари маҳсулот, чун себ, нок, помидор, карам, пиёз, сабзӣ рӯ ба арзонӣ оранд. Тавре дар урфият мегӯянд: “бардорад, зам кун, набардорад кам”. Фаровонии меваю сабзавоти имсола имкон дод, ки мизони бозорҳо коҳиши нархҳоро нишон диҳанд.