Ин баҳор гулҳои шукуфтаи дарахтони бодом ба Наврӯзгоҳ шукӯҳи тоза мебахшанд

ДУШАНБЕ, 23.01.2018 /АМИТ «Ховар»/. Тавре қаблан хабар дода будем, имсол дар пойтахти мамлакат- шаҳри Душанбе баргузории якчанд чорабинии дорои аҳамияти минтақавию байналмилалӣ дар назар дошта шудааст.

Дар робита ба ин Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон  роҳбарияти Мақомоти иҷроияи ҳокимияти давлатии шаҳри Душанбе ва идораҳои марбутаро  вазифадор намуданд, ки таҷлили ҷашни  Наврӯзи байналмилалӣ, қабули  сарони давлатҳо ва  меҳмонони воломақом, инчунин муаррифии сарзамини Тоҷикистон ба меҳмонону сайёҳони хориҷиро   дар сатҳи баланд ба роҳ монанд.

Тавре аз Раёсати иттилоот ва робитаҳои хориҷии дастгоҳи Раиси шаҳри Душанбе ба АМИТ «Ховар» хабар доданд,   бо ин мақсад 21 январи соли 2018  Пешвои миллат муҳтарам Эмомалӣ Раҳмон бо Раиси шаҳри Душанбе Рустами Эмомалӣ дар Боғи Наврӯзгоҳи пойтахт дарахтони нодири сояафкану ороишии кипарис, Сарви лейландӣ ва секвоя шинонида, ба маъракаи ниҳолшинонӣ ва вусъати корҳои ободонию сабзазоркунӣ  дар пойтахт ҳусни оғоз бахшиданд.

Дар ин рӯз  ҳашари ниҳолшинонӣ тибқи нақшаи асосии ободонию бунёдкорӣ ва навсозии пойтахти ҷумҳурӣ-шаҳри Душанбе дар майдони Боғи Наврӯзгоҳи пойтахт сурат гирифта, ба хотири зебою озода кардани хиёбонҳои шаҳр дарахтони зиёди ороишию ҳамешасабз  шинонида шуданд.

Дар баробари дарахтони ороишӣ дар маъракаи ниҳолшинонӣ беш аз ҳазор адад ниҳолҳои дарахтони бодом  шинонида шуд. Дарахтони мевадиҳандаи бодом дар асоси супориши Пешвои миллат муҳтарам Эмомалӣ Раҳмон аз Боғи миллии Тоҷикистон ва Хоҷагии деҳқонии «Асадулло»-и ноҳияи Хуросони вилояти Хатлон дастрас гардиданд.

Хотиррасон менамоем, ки Боғи Наврӯзгоҳ  соли 2014 бо ташаббус ва иштироки бевоситаи Сарвари давлат муҳтарам Эмомалӣ Раҳмон мавриди баҳрабардорӣ қарор гирифта буд ва он дар масоҳати 146 ҳазор метри мураббаъ доман паҳн кардааст.

Боғи  мазкур  дар миёни Қасри миллат ва майдони Наврӯзгоҳи пойтахт қарор гирифта,  дар он дарахтони зебою нодири боҳашамати ороишию сояафкан ва гулу гулбуттаҳо аз давлатҳои гуногун оварда, шинонида шудаанд. Аз ҷумла, дар 15 гектари боғи  мазкур  дарахтони санавбар, калина, сарвиноз, ёс, ҷалғӯза, як навъи сарв, каталпа, можевелник, татум, магнолияи ҳамешасабз, чинор, тӯси маҳаллӣ, шоҳбулут, зирк, заранги сурх, сарв, маҷнунбед ва гули садбарг шинонида шудаанд.

Рухсораи НУР,

АМИТ “Ховар”