Машварати корӣ оид ба омодагӣ ба ҷашнҳои миллӣ ва чорабиниҳои муҳими давлатӣ

ДУШАНБЕ, 28.02.2018 /АМИТ «Ховар»/. Имрӯз дар ҳузури Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Абдуҷаббор Раҳмонзода бо иштироки роҳбарони вазорату идораҳо, ташкилоту муассисаҳо ва мақомоти иҷроияи ҳокимияти давлатӣ доир ба иҷрои дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати омодагӣ ба ҷашнҳои миллию байналмилалӣ ва давлатӣ, аз ҷумла Наврӯзи байналмилалӣ, Рӯзи Модар, корҳои ободонӣ, кишту кори саҳроӣ ва гузаронидани ҳашарҳои умумӣ машварати корӣ доир гардид.

Зикр гардид, ки дар сатҳи баланд ва бо назардошти фарҳанги миллӣ ва урфу одатҳои мардумӣ таҷлил намудани ҷашнҳои миллӣ, бунёдкориву обод намудани ҳар гӯшаи диёр ба нуфузи байналмилалии кишвар таъсири мусбат мерасонад. Аз ин рӯ, зарур аст, ки либосҳои миллии тавсиявӣ ва доир намудани ҳашарҳои умумӣ пайваста миёни мардум тарғибу ташвиқ карда шаванд.

Ба тамоми масъулин тавсия дода шуд, ки вазифагузориҳо ва дастурҳои дар ин самт додашуда бояд саривақт ва бо сифати баланд анҷом дода шаванд.