СӮХТОРИ КЕМЕРОВО-САБАҚ БАРОИ МАРКАЗҲОИ САВДО. «Душанбе Мол» омодагии ҳамаҷонибаи худро ҳангоми сар задани сӯхтор баён дошт

ДУШАНБЕ, 29.03.2018 /АМИТ «Ховар»/.  Имрӯз дар Маркази савдои «Ашан» («Душанбе Мол») амалиёти бонги хатари санҷишии сӯхтор ва ба макони амн кӯчонидани муштариён гузаронида шуд. Ин амалиёти санҷишӣ таҳти назорати комиссияи махсус иборат аз намояндагони мақомоти прокуратура ва хадамоти сӯхторхомӯшкунии шаҳри Душанбе сурат гирифт.

Тавре роҳбарияти Маркази савдои мазкур дар саҳифаи Фейсбукии худ иброз доштаанд, дар ин макон ҳамаи низомҳои бехатарӣ аз сӯхтор коршоям буда, таҳти назорат қарор доранд.

Ҳамчунин дар саҳифаи худ кормандони ин фурӯшгоҳ ба наздикону пайвандони дар Маркази савдои «Зимняя вишня»-и шаҳри Кемеровои Россия бар асари сӯхтор фавтида изҳори тасаллият намудаанд, ки ин ҳодисаи нохуш бояд барои ҳама гуна  марказҳои хизматрасонӣ дарси ибрат гардад.

Ба иттилои роҳбарият, дар ҳар як ошёнаи марказ чандин ҷевонҳои бехатарӣ аз сӯхтор вуҷуд дошта, дар ошёнаи 1-ум 5 адад, ошёнаи 2-юм — 6 адад, ошёнаи 3-юм (фудкорт) – 6 адад ва дар ошёнаи 4-ум 5 адад  роҳи баромад зимни сӯхтор сохта шудаанд.

«Дар ҳар кадоме аз мағозаҳо, кинотеатру минтақаҳои фудкорт, минтақаҳои умумӣ дастгоҳҳои сӯхторхомӯшкунӣ гузошта шудаанд. Инчунин дар назди зинапояҳои ҳар яке аз ошёнаҳо нақшаи кӯчонидан овехта шудааст»,-омадааст дар саҳифаи ин Марказ.