Дар Душанбе ҳамкории байнипарлумонии Тоҷикистону Миср баррасӣ гардид

ДУШАНБЕ, 13.04.2018 /АМИТ «Ховар»/. Имрӯз муовини Раиси Маҷлиси намояндагони Маҷлиси Олии Ҷумҳурии Тоҷикистон Акрамшо Фелалиев бо Сафири фавқулода ва мухтори Ҷумҳурии Арабии Миср дар Ҷумҳурии Тоҷикистон  Иҳаб Аҳмад Талат Наср  мулоқот намуд.

Тибқи иттилои котиби матбуотии Маҷлиси намояндагон Муҳаммадато Султонов, зимни суҳбати пурмуҳтаво ҳарду ҷониб ҳавасмандии устувори худро ба густариши бештари равобити дӯстӣ, байнипарлумонӣ ва ҳамкории гуногунпаҳлӯ таъкид намуданд.

Дар мулоқот ҳамчунин аз рушду тавсеаи бештари муносибатҳои байнидавлатӣ изҳори қаноатмандӣ карда шуд ва таъкид гардид, ки муколамаҳои мунтазами сатҳи баланди сиёсӣ асоси таҳкими равобит ва ҳамкории ду кишвари дӯст дар ҳама арсаҳо ва соҳаҳо ба ҳисоб мераванд.

Дар робита ба ҳамкории байнипарлумонӣ пешниҳод гардид, ки гурӯҳи дӯстии байнипарлумонӣ таъсис дода шавад. Боиси тазаккур аст, ки ин гурӯҳ дар раванди ба тасвиб расонидани санадҳои дуҷониба ва бисёрҷониба саҳми намоён гузошта, ҷиҳати густариши бештари ҳамкорӣ мусоидат хоҳад кард.

Акрамшо Фелалиев таъкид намуд, ки Тоҷикистон ва Миср дар мавриди масъалаҳои муҳими ҷаҳонӣ ва минтақавӣ мавқеи ҳамсон доранд. “Мо омодаем, ки дар арсаи байналмилалӣ, махсусан дар чаҳорчӯби созмонҳои минтақавӣ ва байналмилалӣ, аз қабили Созмони Милали Муттаҳид ва Созмони ҳамкории исломӣ, ҳамоҳангсозии мавқеъҳо ва ҳамкорӣ бо Мисрро идома диҳем”, — афзуд А. Фелалиев.

Сафири фавқулода ва мухтори Ҷумҳурии Арабии Миср дар Ҷумҳурии Тоҷикистон  Иҳаб Аҳмад Талат Наср дар навбати худ  аз густариши робитаҳо ва ҳамкории судбахши ду кишвар ва ҳамчунин аз сатҳи баланди эътимод ва ҳусни ният дар муколамаи сиёсии сатҳи олӣ изҳори хушнудӣ намуд.