Рӯзҳои фарҳанги вилояти Суғд дар вилояти Самарқанд баргузор мешаванд

ДУШАНБЕ, 20.04.2018 /АМИТ «Ховар»/. Аз 20 то 22 апрели соли равон Рӯзҳои фарҳанги вилояти Суғди Ҷумҳурии Тоҷикистон дар вилояти Самарқанди Ҷумҳурии Ӯзбекистон баргузор мешаванд.

Дар ин бора аз Хадамоти матбуоти раиси вилояти Суғд ба АМИТ «Ховар» хабар дода, зикр карданд, ки бо мақсади иштирок дар Рӯзҳои фарҳанги вилояти Суғд аллакай гурӯҳи калони намояндагони вилояти Суғд ба вилояти Самарқанд сафар намуданд.

Ба иттилои манбаъ, дар назар аст, ки дар ин рӯзҳо ҳамчунин миёни соҳибкорони вилояти Суғд ва вилояти Самарқанд Бизнес – форум баргузор шавад. Интизор меравад, ки дар доираи Бизнес – форум миёни соҳибкорони ҳарду ҷониб созишномаҳои ҳамкорӣ ба имзо расанд.

Тавре қаблан иттилоъ додем, дар доираи Рӯзҳои фарҳанги вилояти Суғд ҳамчунин дастаи  футболи «Хуҷанд»-и шаҳри Хуҷанд бо дастаи футболи «Динамо»-и шаҳри Самарқанд 20 апрел дидори дӯстона анҷом медиҳад.