Дар Душанбе намоиши маҳсулоти корхонаҳои бонуфузи тракторбарорӣ ва мошинсозии Ҷумҳурии Беларус доир карда шуд

ДУШАНБЕ, 18.05.2018 /АМИТ «Ховар»/. Имрӯз, 18 майи соли равон дар майдони МД «Мактаби ҷумҳуриявии маҳорати олии варзишӣ оид ба намудҳои гӯштин» дар доираи намоишгоҳи молу маҳсулоти Ҷумҳурии Беларус дао Ҷумҳурии Тоҷикистон намоиши маҳсулоти корхонаҳои бонуфузи тракторбарорӣ ва мошинсозии Беларус доир карда шуд.

Тавре хабарнигори АМИТ «Ховар» хабар медиҳад, дар намоишгоҳ корхонаҳои бонуфузи тракторбарорӣ ва мошинсозии Ҷумҳурии Беларус, аз қабили «Амкодор», «Гомселмаш», «БелАЗ», «МТЗ» ва «МАЗ» зиёда аз 50 навъи мошинҳои муосири кишоварзӣ, коммуналӣ, сохтмонӣ ва боркашро, ки ба тамоми меъёрҳои байналмилалӣ ҷавобгӯ мебошанд, ба маъраз гузоштанд. Аз ҷониби  ширкатҳои беларусӣ ҳамзамон таври истифодаи комбайнҳои ғаллағундор, пахтачинӣ, хошокғундорӣ, тухмипошакҳои гуногун, таҷҳизоти кишт ва борбардор намоиш дода шуд.

Дар чорабинӣ намояндагони Палатаи савдо ва саноат, Вазорати кишоварзӣ ва соҳибкорон иштирок намуда, ба маҳсулоти истеҳсолнамудаи Беларус баҳои баланд доданд.

Роҳбарияти Палатаи савдо ва саноати Ҷумҳурии Тоҷикистон, ки аз ташкилкунандагони ин намоиш мебошанд, дар маросими ифтитоҳи он доир ба аҳамияти истифодаи ин техникаҳо зикр карданд, ки  баргузории чунин намоишгоҳҳо барои дарёфти шарикони нав ва густариши муносибатҳои тиҷоратию иқтисодӣ мусоидат мекунад.

Гуфта мешавад, ки дар ҷараёни кори намоиш соҳибкорони тоҷик имкон пайдо мекунанд, ки бо маҳсулоти гуногуни корхонаҳои Ҷумҳурии Беларус аз наздик шинос шуда, бевосита аз намояндагони ширкатҳо доир ба самтҳои истифодаи онҳо машваратҳои судманд гиранд ва ҳамчунин баҳри рушди тиҷорати худ маҳсулоти дилхоҳ интихоб намоянд.

Ёдовар мешавем, ки намоишгоҳи молу маҳсулоти Ҷумҳурии Беларус дар шаҳри Душанбе то рӯзи 23 майи соли равон идома меёбад.