Имрӯз нахустин автобуси Тоҷикистон ба шаҳри Тошканд ворид гардид

ТОШКАНД, 16.05.2018 /АМИТ «Ховар»/. Рафтуомади дуҷонибаи шаҳрвандон аз ҷумлаи мавзӯъҳои меҳварии мулоқоти Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Ӯзбекистон Шавкат Мирзиёев буд, ки даҳаи аввали моҳи марти соли равон дар шаҳри Душанбе баррасӣ гардид ва дар амал татбиқ карда шуд.

Гувоҳи натиҷаи ин мулоқот дар он аст, ки имрӯз, 16 май нахустин автобуси ширкати «Asian Express Terminal» — и Тоҷикистон аз шаҳри Хуҷанди вилояти Суғд вориди шаҳри Тошканди Ҷумҳурии Ӯзбекистон гардид.

Тавре мухбири АМИТ «Ховар» Шукӯҳи ДАЛЕР аз шаҳри Тошканд хабар медиҳад, ба ҳайати Тоҷикистонро дар Ӯзбекистон бо нону намак ва садои карнаю сурнай истиқбол гирифтанд. Ба ҳайати Тоҷикистон, ки ба Ӯзбекистон сафар намуд, намояндагони Вазорати нақлиёти ҶТ, илму адаб ва рӯзноманигорон шомил мебошанд. Раиси маркази миллӣ-мадании тоҷикони Ӯзбекистон Шарофат Эрматова ҳайати Тоҷикистонро ба Тошканд хайрамақдам гуфта, иброз намуд, ки рушди муносиботи ду кишвар хеле назаррас мебошад.

Тавре қаблан иттилоъ додем, дирӯз, 15 май аввалин автобусҳои ширкати «Манзара Туризм»-и Ӯзбекистон вориди шаҳри бостонии Хуҷанд шуда, ҳайати меҳмонон аз мавзеъҳои таърихӣ ва фарҳангии он дидан намуданд.

Директори нақлиёти ширкати «Осиё Гурӯҳ Тоҷикистон» Султон Саломов ба хабарнигори АМИТ «Ховар» изброз дошт, ки ин нахустин автобус дар хатсайри байналмилалии Хуҷанд-Тошканд мебошад, ки инак вориди пойтахти Ҷумҳурии Ӯзбекистон — шаҳри Тошканд шуд ва минбаъд мунтазам фаъолит мекунад. «Дар оянда дигар хатсайрҳо, ба монанди Хуҷанд-Конибодом-Қуқанд, Панҷакент-Самарқанд, Душанбе-Термиз, Душанбе -Деҳнав ва Душанбе-Самарқанд-Бухоро ба роҳ монда мешаванд», — иттилоъ дод С. Саломов.

Ба гуфтаи масъулин, ҳоло нархи роҳкиро аз ҳарду ҷониб 50 сомонӣ муқаррар гардидааст. Ҳар рӯз аз Тоҷикистон ба Ӯзбекистон 2 — маротиба хатсайр ба роҳ монда шудааст, ки яке соати 8 субҳ ва дигаре соати 12 ба роҳ мебароянд.

«Албатта теъдоди автобусҳо бо назардошти шумораи мусофирон зиёд карда мешавад, — афзуд Султон Саломов. Зеро рафтуомади мусофирон, интиқол ва гардиши мол ва рушди тиҷорат аз зумраи он самтҳое мебошанд, ки ба беҳтар гардидани некӯаҳволии аҳолии ҳарду мамлакат мусоидат мекунанд ва барои инҳо тамоми заминаҳои хуқуқи фароҳам оварда шудаанд».

Ёдовар мешавем, ки ҳайати Тоҷикистон дар доираи сафар ҳамчунин аз мавзеъҳои таърихиву фарҳангии шаҳри Тошканд дидан менамоянд.