Маркази миллии тестӣ дар чор минтақаи ҷумҳурӣ маъмурони имтиҳонӣ омода мекунад

ДУШАНБЕ, 15.05.2018. /АМИТ «Ховар»/. Тибқи нақшаи чорабиниҳои Маркази миллии тестии назди Президенти Ҷумҳурии Тоҷикистон оид ба ташкил ва гузаронидани имтиҳонҳои марказонидаи дохилшавӣ (ИМД) ба муассисаҳои таълимии таҳсилоти миёна ва олии касбии Ҷумҳурии Тоҷикистон дар соли таҳсили 2018-2019, бо мақсади омода намудани маъмурони имтиҳонӣ дар 4 минтақаи ҷумҳурӣ – шаҳрҳои Душанбе, Кӯлоб, Бохтар ва Хуҷанд бо шумораи 65 нафар иштирокдор давраи 1-уми семинар-машварати омӯзишӣ барои омода кардани кормандони муваққатӣ ҷиҳати гузаронидани ИМД-2018 баргузор мегардад.

Тавре аз маркази матбуоти Маркази миллии тестии назди Президенти Ҷумҳурии Тоҷикистон ба АМИТ «Ховар» хабар доданд, семинар-машварат аз 15 то 16 майи соли 2018 дар шаҳри Душанбе барои намояндагони ноҳияҳои шаҳри Душанбе, шаҳру ноҳияҳои тобеи ҷумҳурӣ ва Вилояти Мухтори Кӯҳистони Бадахшон, аз 18 то 19 май дар шаҳри Хуҷанд барои намояндагони шаҳру ноҳияҳои вилояти Суғд, дар шаҳри Кӯлоб барои намояндагони шаҳру ноҳияҳои минтақаи Кӯлоби вилояти Хатлон ва дар шаҳри Бохтар барои намояндагони шаҳру ноҳияҳои водии Вахши вилояти Хатлон баргузор мешавад.

Гуфта мешавад, ки ҳайати гурӯҳи корӣ барои ташкил ва баргузории семинар-машварати омӯзишӣ барнома, модули омӯзишӣ ва маводи иловагии ёрирасонро омода намудааст.