«ОБУ ОТАШ»- НАМОИШ ДАР БОРАИ ТАҲАММУЛГАРОӢ. Ходимони дини Ҳисору Шаҳринав ва Турсунзода имрӯз барои тамошои ин спектакл ба Душанбе омаданд

ДУШАНБЕ, 14.05.2018./АМИТ «Ховар»/. Имрӯз, 14-уми май, масъулони Маркази исломии Ҷумҳурии Тоҷикистон ва ходимони дини шаҳрҳои Ҳисору Турсунзода ва ноҳияи Шаҳринав дастаҷамъона дар театри ба номи Абулқосим Лоҳутӣ  спектакли «Обу оташ»-ро тамошо намуданд. Дар ин бора ба АМИТ «Ховар» аз Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷуҳурии Тоҷикистон хабар доданд.

«Барои мусулмонони Ватани мо, ки пайравони мазҳаби муътадилу таҳаммулгарои ҳанафӣ мебошанд, ислом нишонаи имондорӣ, таҳким бахшидани ҷаҳони маънавӣ ва такмили одобу ахлоқ ба ҳисоб меравад», — иброз намуданд Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар мулоқот бо аҳли ҷомеа, ки 12 май, дар арафаи моҳи шарифи Рамазон,  дар Душанбе доир гардид.  Маҳз ҳамин арзишҳои нек – таҳаммулгароӣ, ҷаҳони маънавӣ, одобу ахлоқ аз мавзӯҳои асосии намоишномаи  «Обу оташ»-и нависанда ва драмнависи шинохтаи тоҷик, шореҳи адабии АМИТ «Ховар»  Мансур Суруш мебошанд. Ин асар драмаи иҷтимоӣ буда, дар он ихтилоф ва бархӯрди ақидаву андешаҳо дар заминаи арзишҳои динию мазҳабӣ ва илмию дунявӣ ба таври бадеӣ инъикос ёфтаанд.

Ба қавли дастандаркорони театр, ҷавҳари асосии намоиш муҳаббат мебошад, ки инсонҳоро бо вуҷуди ихтилофи назар ва ақоид ба ҳам меоварад ва таҳаммулпазириву меҳру ихлосро талқин менамояд.

Коргардони асар Хунарпешаи халқии Тоҷикистон Шералӣ Абулқайсов бо истифода аз осору фалсафаи ниёгон, хусусан ашъори Ҷалолуддини Балхӣ, Носири Хусрав ва Муҳаммад Иқболи Лоҳурӣ ба намоиш як навъ ҷанбаи фасафӣ бахшидааст. Анҷоми асар бо рӯҳияи ҳамдигарфаҳмию таҳаммулпазирӣ, муҳаббату эҳтиром ба арзишҳои мазҳабию иҷтимоӣ бадеияти хосса касб кардааст.

Ҷанбаи ахлоқиву тарбиявии намоиш дар нақшофаринӣ ва ҳунару истеъдоди  Ҳунарпешаҳои халқии Тоҷикистон Носир Ҳасанов, Муҳаммадҷон Шодиев, Саодат Азизова, Зулхумор Иброҳимова, Асалбек Назриев, Ортиқ Қодиров, Бобоҷон Ҳасанов, Ҳунарпешаи шоистаи Тоҷикистон Муҳаммадӣ Мирзовалиев, ҳунарманди маъруф Сония Наврӯзова ва дигарон хеле равшан таҷассум ёфтааст. Рассоми намоиш Нина Панова дар ороиши саҳна ғоя ва муҳтавои асарро комилу рангин инъикос намудааст. Мусиқии асар бо оҳанги ҷаззоби ромишгар ва оҳангсози маъруфи тоҷик Далер Назаров таҷассумгари рӯҳия ва фалсафаи намоиш мебошад.

Чанде қабл кормандони дастгоҳи Марказии Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон дар театри академию драмавии ба номи устод Абулқосим Лоҳутӣ аз намоиши театрии “Обу оташ” дидан намуда буданд.