ТАВАҶҶУҲ! Мехоҳед ба ҳайси ронанда дар автобусҳои шаҳрӣ ба мусофирон хизмат расонед? Пас шитобед!

ДУШАНБЕ, 07.05.2018 /АМИТ «Ховар»/. Муассисаи давлатии коммуналии «Душанбенақлиётхадамотрасон» хоҳишмандонро ба ҳайси ронандагони автобусҳои шаҳрӣ даъват менамояд.

Дар эълоне, ки дар сомонаи расмии Мақомоти иҷрояии  ҳокимияти давлатии шаҳри Душанбе ҷой дода шудааст, гуфта мешавад, ки  ронандагони дорои шаҳодатномаи ронандагии тахассуси дараҷаи «D» ва собиқаи кории на кам аз панҷ сол метавонанд ҳуҷҷатҳои худро ба Корхонаҳои коммуналии воҳиди давлатии «Автобус-1», «Автобус-2» ва «Автобус-3» бо суроғаи кӯчаи «Варзишгарон» – 5, кӯчаи «Н.Ҳувайдуллоев» – 5 ва кӯчаи «С.Айнӣ» – 66 пешниҳод намоянд.

Бояд тазаккур дод, ки дар роҳҳои пойтахт ҳамарӯза беш аз 2 ҳазору 200 адад нақлиёти ҷамъиятӣ ба мусофирон хизмат мерасонанд, ки аз ин омор 200 ададро — автобус, 76 ададро — троллейбус  ва наздик ба  2000 ададро — микроавтобусҳо ташкил медиҳанд. Инчунин дар пойтахт 68 хатсайри мусофирбар, аз ҷумла 45 хатсайри микроавтобусҳо, 15 хатсайри автобусҳо ва 8 хатсайри троллейбусҳо фаъолият менамояд.

Тавре дар суҳбат ба хабарнигори АМИТ «Ховар» директори муассисаи давлатии коммуналии «Душанбенақлиётхадамотрасон»  Фирдавс  Саидзода иттилоъ дод, фосилаи ҳаракати автобусҳо дар соатҳои афзоиши анбуҳи мусофирон дар хастсайрҳои №1,№2,№3, №7, №8,№18 ва №28 аз 3 то 5 дақиқа ва дар соатҳои маъмулӣ аз 5 то 7 дақиқаро ташкил медиҳад.