Дар Таваллудхонаи вилояти Суғд чоргоник ба дунё омад

ХУҶАНД, 14.06.2018. /АМИТ «Ховар»/.  12 июн соати 20:40 дар Таваллудхонаи вилоятии вилояти Суғд чоргоник – се писар ва як духтар ба дунё омад. Модари ин чоргоникҳо зани 35-солаи сокини Ҷамоати Овчӣ–Қалъачаи ноҳияи Бобоҷон Ғафуров Назокат Ҳодибоева мебошад.

Тавре ба АМИТ «Ховар»  аз  Таваллудхонаи вилоятии вилояти Суғд  иттилоъ доданд,  кӯдакони навзод пеш аз муҳлати таваллуд, яъне дар ҳафтаи  35-умини  ҳомиладорӣ тавлид ёфта, вазни чоргоникҳо, яъне писарчаи якум- 2760 гр, дуюм 2190 гр, сеюм- 2057 гр ва вазни духтарча 1700 гр мебошад. Ҳоло навзодон дар шуъбаи эҳёи навзодони таваллудхона таҳти назорати бевоситаи духтурон қарор дошта, ҳолати худи зан қаноатбахш арзёбӣ гардид.

Тавре Назокат Ҳодибоева баён медорад, то кунун дар оилааш ду писар ва ду духтарро ҳамроҳи ҳамсараш ба воя расонида, имрӯз бо таваллуди ин чоргоникҳо шумораи фарзандонаш ба 8 нафар- 5 писар ва 3 духтар расид. Аз тавлиди чоргоникҳо ин модари хуштолеъ бисёр хурсанд буда, ният дорад ҳамаи фарзандонашро сиҳату саломат ба воя расонад, то онҳо дар оянда мутахассиси соҳибкасб гардида, номбардори Ватан бошанд.

Масъулини мақомоти иҷроияи ҳокимияти давлатии ноҳияи Бобоҷон Ғафуров дирӯз навзодонро аёдат намуда, ба чоргоникҳо  либоси кӯдакона, аробача ва дигар лавозимоти зарурии кӯдакона тақдим намуданд. Ҳамчунин масъулин баён доштанд, ки барои нигоҳубини кӯдакон ба модари навзодон кумак расонида мешавад.

Ба иттилои духтурони муассисаи мазкур, ин якумин тавлиди чоргоник  дар таърихи Таваллудхонаи вилояти Суғд ба ҳисоб рафта, пизишкони таваллудхона кӯшиш доранд, ки модару навзодон саломат ба хона баргарданд.