«ДУШАНБЕШАҲР – МАСКАНИ ЗЕБОӢ ВА ОЗОДАГИСТ». Таҳти ҳамин унвон дар «Наврӯзгоҳ» — и пойтахт барномаи фарҳангӣ-фароғатӣ доир мешавад

ДУШАНБЕ, 04.06.2018 /АМИТ «Ховар»/. Пагоҳ, 5 июни соли 2018, соати 18:00 дар Муассисаи давлатии «Наврӯзгоҳ»-и шаҳри Душанбе таҳти унвони «Душанбешаҳр – маскани зебоӣ ва озодагист» барномаи фарҳангӣ-фароғатӣ  доир  мешавад.

Тавре аз Раёсати иттилоот ва робитаҳои хориҷии дастгоҳи Раиси шаҳри Душанбе ба АМИТ «Ховар» хабар доданд,  барномаи мазкур ба мақсади таҷлили бошукӯҳи Рӯзи байналмилалии муҳити зист, ҳамзамон иҷрои Барномаи давлатии комплексии рушди тарбия ва маърифати экологии аҳолии Ҷумҳурии Тоҷикистон дар давраи то соли 2020 нигаронида шудааст.

«Кормандони соҳаи ҳифзи муҳити зист ва муҳофизону дӯстдорони табиат ҳар сол дар ин рӯз иди касбии худро ҷашн мегиранд. Мувофиқи нақшаи чорабиниҳои Мақомоти иҷроияи ҳокимияти давлатии шаҳри Душанбе дар   барномаи фарҳангӣ-фароғатии  мазкур  маҳсули кори  дастӣ, ихтироъ ва навоварии донишҷӯёни донишгоҳу донишкадаҳо,  муассисаҳои таҳсилоти миёнаи умумӣ ва касбӣ-техникии  пойтахт ва  дигар  дастовардҳои идораву муассисаҳои дахлдор  вобаста ба муҳити зист ба намоиш гузошта мешаванд. Дар қисмати фароғатии ин барнома  ҳунармандон бо суруду таронаҳои ҷолиб хотири ҳозиринро  болида  ҳоҳанд намуд», — афзуд  манбаъ.

Хотиррасон менамоем, ки Рӯзи умумиҷаҳонии  муҳити зист чун иқдоми байналмилалӣ аз «Муроҷиатномаи Ментовӣ» ба Котиби генералии СММ сарчашма мегирад. «Муроҷиатнома»-и мазкур 11 майи соли 1971 аз ҷониби 2200 нафар ходимони илму фарҳанги 23 кишвари ҷаҳон ба имзо расид. Дар ҳамон сол олимон бонги хатар заданд, ки ифлосшавии муҳити зист ба инсоният оқибатҳои нохуш меорад.

Баъд аз як сол (1972) дар пойтахти Шветсия-шаҳри Стокголм Конфронси умумиҷаҳонӣ оид ба ҳифзи муҳити зист доир гашт, ки дар кори он намояндагони 113 кишвар иштирок дошта, барои 5 июн ҷашн гирифтани Рӯзи умумиҷаҳонии муҳити зист қарор қабул карданд.