«Нақши Қонуни миллӣ дар таъмини адолати иҷтимоӣ ва солимгардонии фазои маънавӣ». Бо ин унвон дар Душанбе конференсияи илмӣ- назариявӣ доир гардид

ДУШАНБЕ, 19.06.2018 /АМИТ «Ховар»/. Имрӯз  бо ташаббуси Мақомоти иҷроияи ҳокимияти давлатии шаҳри Душанбе дар  Муассисаи давлатии «Душанбе – Плаза»   дар мавзӯи «Нақши Қонуни миллӣ  дар таъмини адолати иҷтимоӣ ва солимгардонии фазои маънавӣ»  конференсияи  илмӣ-назариявӣ доир шуд.

Тавре хабарнигори АМИТ «Ховар» иттилоъ медиҳад, дар  конференсияи мазкур  намояндагони Дастгоҳи иҷроияи Президенти Ҷумҳурии Тоҷикистон, вазорату кумитаҳо, Академияи илмҳо, мақомоти ҳифзи ҳуқуқ, олимону пажӯҳишгарони  соҳа, раисони шаҳраку маҳаллаҳо, сохторҳои шаҳрӣ ва ноҳиявӣ, масъулини тарабхонаҳо, иттиҳодияҳои динӣ, марказҳои фароғатӣ ва воситаҳои ахбори омма  иштирок доштанд.

Дар конференсия муовини Раиси шаҳри Душанбе  Мавсума Муинӣ зикр кард, ки  Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон», ки  бо ташаббуси бевоситаи    Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон  ба вуқӯъ пайваст, воқеан ҳам дар таърихи қонунгузории мамлакат  ҳодисаи  нодир буда, иқдоми навбатии давлати соҳибистиқлол дар бунёди ҷомеаи шаҳрвандию давлати ҳуқуқбунёд маҳсуб мешавад, ки заминаи онро арзишҳои миллӣ ва фарҳангӣ  ташкил медиҳанд.

Сипас иштирокдорони конфронс дар мавзӯъҳои  «Ҷойгоҳи анъанаву  маросими миллӣ дар фазои маънавии ҷомеа», «Қонуни миллӣ – эҳёи фарҳангӣ дар ҳаёти иҷтимоӣ», «Нақши рафтори виҷдонӣ дар татбиқи Қонуни миллӣ», «Қонуни миллӣ –эҳёи фарҳангӣ дар ҳаёти иҷтимоӣ», «Қонуни миллӣ — кафолати зиндагии шоиста» ва ба ин монанд маърӯза карда, бо мисолҳои мушаххас ин мавзӯъҳоро шарҳ доданд.

Маърӯзачиён, аз ҷумла, зикр карданд, ки  воқеан ҳам рисолати қонуни мазкур  ислоҳоти маънавӣ дар ҳаёти иҷтимоӣ буда,  дар зарфи 11 соли татбиқи он   дар ҳаёти сокинони мамлакат таҳаввулоти фарҳангию иҷтимоӣ ба вуҷуд овард.

Дар конференсия таъкид гардид, ки татбиқи қонуни мазкур  теъдоди  тӯйҳои домодию арӯсӣ ва   хатнасурҳои хайриявиро  афзуд.  Масалан,  давоми 11 моҳи соли 2017  410 адад  тӯйҳои домодию арӯсӣ  ва   6347 адад  хатнасурҳо ба таври хайриявӣ баргузор гардиданд. Ҳангоми назорати ҷараёни баргузории маъракаву маросимҳои шаҳрвандон аз ҷониби масъулини соҳа  663 ҳолати вайрон кардани қонун ошкор гардидааст.

Ҳамчунин дар назди иштирокдорони конференсия  сиёсатмадорону олимон ва коршиносону пажӯҳишгарон  оид ба дастовардҳо ва дурнамои қонуни мазкур сухан гуфтанд.

Нотиқон, аз  ҷумла, зикр карданд,  ки  имрӯз як қатор давлатҳо, аз ҷумла, Қазоқистон, Қирғизистон, Ӯзбекистон ва Ҷумҳурии Исломии Афғонистон баҳри танзим намудани ҷашну маросимҳои миллиашон аз таҷрибаи Тоҷикистон  истифода мебаранд.