ХИЗМАТ БА ВАТАН ҚАРЗИ МАН АСТ! Дар Душанбе барои даъвати тирамоҳии шаҳрвандон ба хизмати ҳарбӣ омодагӣ мегиранд

ДУШАНБЕ, 26.07.2018. /АМИТ «Ховар»/. Бо қарори Раиси шаҳри Душанбе Рустами Эмомалӣ нақшаи чорабиниҳои омодагии муташаккилона ҷиҳати баргузор намудани мавсими даъвати навбатии тирамоҳии  шаҳрвандони солҳои таваллудашон 1991-2000 ба хизмати ҳарбӣ дар соли 2018  тасдиқ гардид.

Тавре аз Раёсати  иттилоот ва робитаҳои хориҷии дастгоҳи Раиси шаҳри Душанбе ба АМИТ «Ховар» хабар доданд,  тибқи қарори мазкур  масъулин вазифадор гардиданд, ки дар ҳамкорӣ бо сохторҳои дахлдор иҷрои саривақтии нақшаи мазкурро таъмин намоянд.

Дар қарори мазкур  омадааст, ки  раисони ноҳияҳо,  Раёсати тандурустии шаҳри Душанбе  ва комиссари ҳарбии шаҳри Душанбе  омӯзиши шаҳрвандони синни даъватиро ба роҳ монда, шумораи дақиқи даъватшавандагонро муайян намоянд ва то санаи 1 октябри соли 2018  барои аз  муоинаи пешакии тиббӣ гузаштани онҳо тадбирҳои зарурӣ андешанд.