Нашриёти «Истеъдод» бахшида ба ҷашни Истиқлолияти давлатӣ нашри 4 китобро ба нақша гирифтааст

ДУШАНБЕ, 10.07.2018 /АМИТ  «Ховар»/. Ҳамасола дар арафаи ин ё он ҷашни муҳими миллиамон, аз ҷумла, Истиқолияти давлатӣ ва Рӯзи Ваҳдати миллӣ китобҳои наве ба нашр расонида мешаванд, ки барои хонандагон муассир арзёбӣ мегарданд. Мухбири АМИТ «Ховар» оид ба омодагӣ ва нашри китобҳо дар арафаи ҷашни Истиқлолияти давлатии Тоҷикистон бо директори нашриёти «Истеъдод» Абдуфаттоҳ Мираҳмадов ҳамсуҳбат шуд.

Абдуфаттоҳ Мираҳмадов зимни суҳбат гуфт, ки нашриёти «Истеъдод» бахшида  ба ҷашни 27-солагии Истиқлолияти Тоҷикистон нашри 4 китобро ба  нақша гирифтааст. Дар айни ҳол якчанд китобҳо барои нашр фиристода шудаанд, баъзеи дигарашон дар арафаи таҳриру саҳифабандӣ қарор  доранд, ки яке аз онҳо китоби «Меъмори истиқлол» аст.

«Ин китоб бо теъдоди 500 нусха нашр мешавад. Он аз ҷониби Иттифоқи композиторони Тоҷикистон омодаи нашр гардида, дар он асарҳои композиторон ҷой дода шудаанд. Китоб дар рӯзҳои таҷлили истиқлолияти Тоҷикистон нашр мешавад. Дар он беҳтарин асарҳо доир ба Ваҳдат, Истиқлолият, Пешвои миллат гирдоварӣ шудаанд»,-илова намуд номбурда.

Ба гуфти ҳамсуҳбати мо, китоби дигаре, ки ба нашр омода шуд,  ҷилди 30-юми китоби «Ваҳдат, Давлат, Президент» мебошад, ки бо  теъдоди 1600 нусха рӯи чоп меояд. Ин  китоб аз ҷониби Ҳаракати ваҳдати миллӣ ва эҳёи Тоҷикистон омодаи нашр гардида, дар он доир ба нақши Пешвои миллат муҳтарам Эмомалӣ Раҳмон дар таъмини сулҳу ваҳдат дар мамлакат сухан меравад.

Як китоби дигар бахшида ба 27-солагии истиқлолияти давлатии Тоҷикистон  аз ҷониби композитор ва оҳонгсоз Аслиддин Низомӣ таҳти унвони «Таърихи мусиқии тоҷик» бо тағийру иловаҳо нашр мегардад. Дар ин китоб доир ба ҳамаи навъҳои мусиқӣ, аз шашмақом сар карда, то жанрҳои гуногуни санъат далелҳои ҷолиб оварда шудаанд.

Ба гуфтаи ҳамсуҳбати мо, китоби дигар аз ҷониби Кумитаи забон ва истилоҳоти назди Ҳукумати Ҷумҳурии Тоҷикистон таҳти унвони «Истиқлолият ва сиёсати давлатӣ  дар бораи забон» ба нашр расонида мешавад, ки бевосита маҷмӯи мақолаҳоро дар бораи рушди забони тоҷикӣ дар даврони истиқлолият дар бар мегирад.

Мавриди зикр аст, ки дар тӯли 27 соли соҳибистиқлолӣ  олимону нависандагон ва аҳли зиёи мамлакат китобҳои зиёдеро ба нашр расонидаанд, ки барои насли наврас муфид арзёбӣ мегарданд.