Вакилони Парлумони Тоҷикистон ба таътили тобистона баромаданд

ДУШАНБЕ, 03.07.2018/АМИТ  «Ховар»/. Вакилони палатаи поёнии Парлумони Тоҷикистон мувофиқи дастури  Маҷлиси намояндагони Маҷлиси Олии Ҷумҳурии Тоҷикистон шурӯъ аз 1 июл ба таътили тобистона баромаданд. Таътили тобистонаи вакилони Маҷлиси намояндагон то 15 август идома ёфта, аз 16 то 30 сентябр онҳо дар кумитаҳо ва комиссияҳои  Маҷлиси намояндагон  фаъолият  менамоянд.

        Бояд тазаккур дод, ки палатаи поёнии Парлумони Тоҷикистон аз 63 вакил иборат буда, онҳо ба муҳлати панҷ сол тавассути  овоздиҳии пинҳонӣ дар ҷараёни баргузории интихоботи парлумонӣ  интихоб карда мешаванд.

Мавриди зикр аст, ки 29 июн Раиси Маҷлиси  намояндагони Маҷлиси Олии Ҷумҳурии Тоҷикистон Шукурҷон Зуҳуров зимни гузориш доир ба ҷамъбасти фаъолияти иҷлосияи чоруми Маҷлиси намояндагони Маҷлиси Олии Ҷумҳурии Тоҷикистон, даъвати панҷум дар назди вакилон зикр намуд, ки «натиҷаҳои аз кумитаву комиссияҳои Маҷлиси намояндагон ва шуъбаҳои Дастгоҳ пешниҳодгашта гувоҳи онанд,  ки  мо тавонистем дар самтҳои асосии фаъолиятамон- қонунгузорӣ, намояндагӣ  ва  робитаҳои байнипарлумонӣ  корҳои муҳимеро ба нафъи давлату миллати хеш ба анҷом расонем».