Нашри осори адибони тоҷик дар маҷаллаи «Jahon adabiyoti»-и Ӯзбекистон

ДУШАНБЕ, 09.08.2018. /АМИТ «Ховар»/. Маҷаллаи адабию бадеӣ ва иҷтимоию  публиситии  Ӯзбекистон «Jahon adabiyoti» /Адабиёти ҷаҳон/, ки муассисаш Шӯрои маънавиёт ва маърифати Ҷумҳурии Ӯзбекистон, Агентии матбуот ва ахбороти Ӯзбекистон ва Иттифоқи нависандагони Ӯзбекистон мебошад,  дар шумораи чоруми имсолаи худ дар зиёда  аз 70 саҳифа эҷодиёти шоирону нависандагони тоҷикро мунташир  сохтааст. Бояд зикр кард, ки  осори адибони тоҷик аз ҷониби мутарҷимони ӯзбек  аз забони тоҷикӣ ба ӯзбекӣ тарҷума шуда, пешниҳоди хонандагон ва аҳли илму адаби Ӯзбекистон  гардидааст.

Дар дохили муқоваи аввали  маҷаллаи «Jahon adabiyoti»  сурати поягузори адабиёти классикии тоҷику форс Одамушуарро Абуабдуллоҳи Рӯдакӣ (858-941) ва дар муқоваи баъдӣ расми асосгузори адабиёти муосири тоҷик устод Садриддин Айнӣ  ҷой дода шудааст, ки таҷассумгари чеҳраҳои барҷастаи адабиёти классикӣ ва муосири тоҷик аст.

Дар маҷалла асари Нависандаи Халқии Тоҷикистон  Абдулҳамид Самад «Қанийди…»,  қиссаи «Қария»-и шоир, нависанда ва драматурги шинохтаи тоҷик Меҳмон Бахтӣ, инчунин  ашъори  шоирони маъруфи  тоҷик Мирзо Турсунзода, Муъмин Қаноат,  Атахон Сайфуллоев, Гулрухсор Сафиева, Бозор Собир, Гулназар, Ҳақназар Ғоиб,  Саидалӣ Маъмур, Зулфия Атоӣ, Аскар Ҳаким,  Низом Қосим, Раънои Зоирдухт, Аҳмадҷон Раҳматзод, Неъмат Оташ,  Саидамин  Ҷило ва Нурмуҳаммад Ниёзӣ чоп гардидааст.

Дар бахши  «GLOBUS» (Глобус)-и маҷаллаи «Jahon adabiyoti» роҷеъ ба таърихи муосири Ҷумҳурии Тоҷикистон, илму фарҳанг,  робитаҳои мутақобилан судманди  Тоҷикистону Ӯзбекистон, хусусан сафари нахустини давлатии Президенти Ҷумҳурии Ӯзбекистон Шавкат Мирзиёев ба Ҷумҳурии Тоҷикистон маводи ҷолиб дарҷ гардидааст.

Марзия САИДЗОДА,
АМИТ «Ховар»
Душанбе-Тошканд