Варзишгарони тоҷик аз Чемпионати ҷаҳон оид ба самбо бо 4 медал ба Ватан баргаштанд

ДУШАНБЕ, 28.08.2018. /АМИТ «Ховар»/. Паҳлавонони  навраси тоҷик дар аввалин мусобиқоти қаҳрамонии ҷаҳон оид ба самбо миёни мактаббачагони солҳои таваллудашон 2002-2003, ки   дар шаҳри Орёли Россия баргузор шуд, чор медал-1 тилло ва 3 биринҷӣ ба даст оварданд.

Тавре аз Федератсияи дзюдои Тоҷикистон ба хабарнигори АМИТ «Ховар» иттилоъ доданд, дар ин мусобиқаи ҷаҳонӣ, ки аввалин бор миёни мактаббачагон доир шуд, намояндагони 25 кишвар ширкат доштанд.

Тоҷикистонро дар ин мусобиқа 9 паҳлавони наврас дар сабқати писарон намояндагӣ кард. Варзишгари навраси тоҷик Ғаниҷон Ғаниев дар рақобатҳо дар вазни 72 кг медали тилло ба даст овард. Се паҳлавони навраси тоҷик -Суннатуллои Мирзоалӣ (55 кг), Субҳиддин Халилзода (66 кг) ва Озодӣ Носиров (78 кг), ки ҷойҳои сеюмро гирифтанд, бо медалҳои биринҷӣ сарфароз гардиданд.

Ба ин тартиб, дар ҳашт вазн миёни писарон варзишгарони Россия, дар як вазн намояндаи Кипр ва дар як вазни дигар гӯштингири Тоҷикистон ғолиб шуда, ба унвони қаҳрамони ҷаҳон даст ёфтанд.