Дар Душанбе бахшида ба Рӯзи Президенти Ҷумҳурии Тоҷикистон мусобиқаи кушоди варзишӣ оид ба футболи хурд барои дарёфти «Ҷоми Раиси шаҳри Душанбе» баргузор мегардад

ДУШАНБЕ, 22.09.2018/АМИТ «Ховар»/. Бо мақсади дар сатҳи баланд таҷлил намудани Рӯзи  Президенти Ҷумҳурии Тоҷикистон, ки ҳамасола 16 ноябр дар мамлакат таҷлил мегардад,  дар майдончаҳои Федератсияи футболи Тоҷикистон аз 20 сентябр то 15 ноябри соли 2018  мусобиқаи кушоди  варзишӣ оид ба футболи хурд байни кормандони вазорату идораҳо ва ташкилоту муассисаҳо барои дарёфти «Ҷоми Раиси шаҳри Душанбе» баргузор  мешавад. Дар ин бора қарори Раиси шаҳри Душанбе Рустами Эмомалӣ ба имзо расид.

Тавре аз Раёсати иттилоот ва робитаҳои хориҷии дастгоҳи Раиси шаҳри Душанбе ба АМИТ «Ховар»  хабар доданд, тибқи қарори мазкур Ҳайати кумитаи тадорукот  ва харҷномаи мусобиқаи мазкур  тасдиқ гардида,  Сарраёсати молияи шаҳри Душанбе  вазифадор гардидааст, ки аз ҳисоби     маблағҳои фонди захиравии Раиси шаҳри Душанбе  барои гузаронидани мусобиқаи    зикршуда    маблағи 58  ҳазор   сомонӣ ҷудо намояд.