МАРҲАБО БА ИДИ АСАЛ! Дар доираи он барои интихоби асалпарвари беҳтарин озмун гузаронида мешавад

ДУШАНБЕ, 14.09.2018. /АМИТ «Ховар»/. Пагоҳ, 15 сентябри соли равон дар  шаҳри Душанбе дар майдони Маҷмааи савдои «Меҳргон» бо ташаббуси Вазорати кишоварзии Ҷумҳурии Тоҷикистон дар ҳамкорӣ бо мақомоти иҷроияи ҳокимияти давлатии шаҳри Душанбе  бо иштироки беҳтарин занбӯрпарварони ҷумҳурӣ Иди асал доир мегардад. 

Тавре ба мухбири АМИТ «Ховар» аз Вазорати кишоварзии Ҷумҳурии Тоҷикистон хабар доданд, бахшида ба 27-умин солгарди Истиқлолияти давлатии Ҷумҳурии Тоҷикистон ва бо мақсади ғанӣ гардонидани дастархони аҳолӣ, таъмини амнияти озуқавории кишвар имсол бо дастуру супоришҳои Ҳукумати Ҷумҳурии Тоҷикистон  шурӯъ аз моҳи сентябр дар шаҳру ноҳияҳо ва вилоятҳои ҷумҳурӣ Иди харбуза ва асал бо шукӯҳу шаҳомати хосса таҷлил гардида истодаанд.

Ба иттилои манбаъ, дар Иди асал занбӯрпарварони вилояти Суғду Хатлон ва ноҳияҳои тобеи ҷумҳурӣ асалҳои гуногун, гиёҳҳои шифобахш, шириниҳои аз он омода гардида ва инчунин ҳунарҳои дастии мардумиро ба маърази намоиш мегузоранд.

Дар ин маъракаи идона барои интихоби асалпарвари беҳтарин озмун гузаронида мешавад. Ғолибони озмун, ки аз тарафи комиссияи тадорукот муайян мегарданд, бо сипоснома ва туҳфаҳои хотирмони Вазорати кишоварзӣ сарфароз мегарданд.

«Дар Иди асал меҳмонон ва сокинони пойтахт аз барномаҳои фарҳангиву фароғатӣ рӯҳу илҳоми тоза гирифта, сипас маҳсулоти ба тамошо гузоштаро метавонанд бо нархҳои дастрас харид намоянд»,-зикр намуд манбаъ.