Намояндагони Тоҷикистон дар Форуми II роҳбарони ҷавони давлатҳои СҲШ ширкат доранд

ДУШАНБЕ, 21.09.2018. /АМИТ «Ховар»/. 20 сентябри соли равон  дар шаҳри Хабаровски Федератсияи Россия Форуми II роҳбарони ҷавони давлатҳои СҲШ расман ба кори худ оғоз намуд. Дар он намояндагони ҷавон аз давлатҳои Тоҷикистон, Ӯзбекистон, Қирғизистон, Қазоқистон, Россия, Беларус, Озарбойҷон, Ҳиндустон, Покистон ва Чин иштирок доранд.

Тавре аз Кумитаи кор бо ҷавонон ва варзиши назди Ҳукумати Ҷумҳурии Тоҷикистон хабар доданд, дар кори форум   намояндагон аз Дастгоҳи иҷроияи Президенти Ҷумҳурии Тоҷикистон ва Кумитаи кор бо ҷавонон ва варзиш сухан гуфта, дар   мавзӯъҳои «Фаъолияти Иттифоқи ҷавонони Тоҷикистон дар байни ҷавонон, робитаю ҳамкорӣ бо ҷавонони кишварҳои аъзои СҲШ»,     «Як роҳ ва як маром дар кишварҳои СҲШ ва ҳамкории иқтисодии Аврупо» ва  «Меҳмонии ҷавонон ба минтақаҳои Тоҷикистон» маърӯза карданд.

Масъулин зимни сухан гуфтан аз имконоту шароит ва дастгириҳои Ҳукумати кишвар дар самти сиёсати давлатии ҷавонон ёдовар шуда, таъкид намуданд, ки тавассути сиёсати  иҷтимоии Пешвои миллат муҳтарам Эмомалӣ Раҳмон ҷавонон дар Ҷумҳурии Тоҷикистон ҳамеша дар мадди назари давлат ва Ҳукумат қарор дошта, барои рушди малакаи зеҳнии онҳо шароити мусоид фароҳам оварда шудааст.

Форуми II роҳбарони ҷавони давлатҳои СҲШ   то 23 сентябр идома меёбад.