САҲА БАРОИ КӢ ҶАЛАСАҲОИ ҲАНГОМАХОҲОНА БАРПО МЕКУНАД? Изҳороти Раёсати Иттифоқи нависандагони Тоҷикистон

Сентябрь 15, 2018 12:36

ДУШАНБЕ, 15.09.2018. /АМИТ «Ховар»/. Имрӯзҳо ба АМИТ «Ховар» чун ягона агентии давлатӣ, ки пайваста паи ҳифзи ормонҳои давлату миллати тоҷик фаъолият мекунад, аз номи кормандони тамоми вазорату идораҳо,   ташкилоту муассисаҳо, созмону ҷамъиятҳо ва одамони алоҳида паёму номаҳо, муроҷиату изҳорот ва  андешаю мулоҳизот ворид мегарданд. Ҳамаи онҳо бо як мақсад-маҳкум намудани дурӯғпароканиҳои неруҳои мухолифини давлати мо дар пойтахти Полша-шаҳри Варшава ва амалҳои иғвогаронаи Ҳизби наҳзати ислом иншо гардиданд. Ин муроҷиатҳо аз он дарак медиҳанд, ки мардуми тоҷик сулҳу суботи пойдори мамлакатро бо ҷон хоҳону нигаҳбон буда, муқобили дигарбора ба коми ҷанг кашидани давлати соҳибистиқлоли хешанд.

 Дар робита ба ин мавзуъ имрӯз ба АМИТ «Ховар» аз номи Иттифоқи нависандагони Тоҷикистон низ муроҷиатнома расид, ки дар он  омадааст:

Адибон, чун кулли зиёиёни миллат, ҳама умр дар орзӯи Истиқлолият, шукуфоии кишвар ва беҳбуди воқеии рӯзгори моддию маънавии мардуми хеш буданду ҳастанд.

Яъне, он чиро мехостанд, ки инак аз шарофати сиёсати созандагию бунёдкории давлату ҳукумати Тоҷикистон муҳайё шудааст. Имрӯз вазифаи ҳар фарди ҷомеа, пеш аз ҳама, барои бештар шудани дастовардҳои Истиқлолият, таҳкими ваҳдату муттаҳидии халқамон, афзудани обрӯю эътибори мамлакат дар арсаи ҷаҳон ҷаҳду талош намудан мебошад.

Амри воқеист, ки қомат рост кардани халқи заҳматкаши кишвари биҳиштосо, афзудани обрӯю эътибори кишвари соҳибистиқлол, дар сархати барномаҳои созмонҳову расонаҳои ҷаҳонӣ зикр шудани ташаббусҳои бузурги башардӯстонаи Ҳукумати Ҷумҳурии Тоҷикистон ва Сарвари заминиву замонии он ба мухолифини безамину безамина, дарбадару лаббайгӯи бозингарони бешарафи хориҷӣ намефорад. Онҳо боз ҳам обро лой карда, моҳӣ гирифтан мехоҳанд, лекин халқи шарифи Тоҷикистон заҳри найрангҳои онҳоро, ки зери парчами ислом амалӣ мекунанд, борҳо чашидаву бадасливу бадбунёдиашонро хуб фаҳмидааст.

Дар ин замина кишвар ба кишвар гаштани ватангадоёни Ҳизби наҳзати ислом ва бо як мушт ашхоси берушди баддилу ҳангомахоҳ ба қавли худашон “конфаронс”-у “сампозюм”-ҳо баргузор намудану бозори туҳмату ғайбатҳои берўёнаро нисбат ба Тоҷикистон гарм карданашон ҳайратовар нест, чунки ҳам неши ин ақрабон аз пайи кин асту ҳам муқтазои табиаташон ин. Ҳайратовар он аст, ки Созмони амният ва ҳамкории Аврупо, ки тибқи номашу барномааш бояд муҳофизи амнияти кишварҳо бошад, халалбахшону вайронкунандагони касифнияти амнияти давлати соҳибистиқлолеро, ки узви ҳама созмонҳои муътабари ҷаҳонӣ, аз ҷумла худи САҲА аст, гӯш медиҳаду барояшон ҷаласаҳои ҳангомахоҳона меорояд.

Раёсати Иттифоқи нависандагони Тоҷикистон ин дастгирии бешарафонаи ҳизби мутаассибону вайронкоронро, ки бисёр кишварҳо ва ташкилотҳои муътабари байналмилалӣ дар асоси санаду далелҳои раднопазир барҳақ террористиву экстремистиаш донистаанд, қотеъона маҳкум намуда, пешниҳод менамояд, ки масъала ҷиддан ба муҳокимаи ҷаласаи сарони СҲШ пешниҳод бигардад ва то ба тавқифи узвияти Ҷумҳурии Тоҷикистон дар САҲА- ин созмони бемавқеъ, дурӯя ва поймолкунандаи принсипу омилҳои амнияти давлатҳову миллатҳо масъалагузорӣ сурат бигирад.

Раёсати Иттифоқи нависандагони Тоҷикистон

Сентябрь 15, 2018 12:36

Хабарҳои дигари ин бахш

Дар муассисаҳои олии Тоҷикистон бо иштироки коршиносони Шурои байнидавлатии муқовимат ба коррупсияи давлатҳои ИДМ дарсҳои озод доир шуданд
Дар шаҳри Душанбе вазъи хизматрасонӣ ба модару кӯдак таҳлил гардид
Дар Душанбе ҷаласаи вазирони давлатҳои аъзои Созмони ҳамкории иқтисодӣ оид ба коҳиши хатари офатҳои табиӣ баргузор гардид
СОЛИ МАЪРИФАТИ ҲУҚУҚӢ. Агар волидон то 3 моҳ барои кӯдак шаҳодатномаи таваллуд нагиранд, ҷарима пардохт менамоянд
Бо татбиқи «Барномаи рушди муассисаҳои табобатии давлатии Ҷумҳурии Тоҷикистон барои солҳои 2022-2025» сатҳу сифати хизматрасонии тиббӣ ба аҳолӣ беҳтар гардид
СОЛИ МАЪРИФАТИ ҲУҚУҚӢ. Ҷавҳари ҷомеаи шаҳрвандӣ дар асоси риояи ҳуқуқи инсон ва волоияти қонун устувор мегардад
Дар Душанбе ҷаласаи Шӯрои ҳамоҳангсоз оид ба ҳамкорӣ бо диаспораҳои тоҷикон ва ҳамватанони бурунмарзӣ доир шуд
Омӯзгори фанни таълими меҳнат аз Рашт Зубдахон Валиева: «Ҳунарамро дар мактаб ба шогирдон ва дар хона ба занон меомӯзонам»
МАСЛИҲАТИ МУТАХАССИС. Сулфаро бе эътибор нагузоред!
СОЛИ МАЪРИФАТИ ҲУҚУҚӢ. Ақдҳои никоҳе, ки аз ҷониби дигар мақомот сабт шудаанд, қувваи қонунӣ надоранд
Ваколатдор оид ба ҳуқуқи инсон дар Тоҷикистон дар конфронси сатҳи баланд дар Рим сухан гуфт
Саҳми таърихии тоҷикон дар ташаккули фарҳанг ва тамаддуни исломӣ. Дар Душанбе конфронси байналмилалӣ оғоз гардид