Дар Душанбе барои дар сатҳи баланд таҷлил намудани Рӯзи Конститутсия омодагӣ мегиранд

ДУШАНБЕ, 20.10.2018 /АМИТ «Ховар»/. Мақомоти иҷроияи  ҳокимияти давлатии шаҳри Душанбе баҳри дар сатҳи баланд таҷлил намудани Рӯзи Конститутсияи Ҷумҳурии Тоҷикистон  тадбирҳои зарурӣ меандешад.  Бо қарори Раиси шаҳри Душанбе  Рустами Эмомалӣ  нақшаи чорабиниҳо оид ба омодагӣ ва таҷлили Рӯзи Конститутсия  дар пойтахт  тасдиқ гардид.

Тавре аз Раёсати иттилоот ва робитаҳои хориҷии дастгоҳи Раиси шаҳри Душанбе ба АМИТ «Ховар»  хабар доданд,   тибқи  нақшаи тасдиқгардида  дар тамоми муассисаву ташкилотҳои   мақомоти иҷроияи ҳокимияти давлатии шаҳри  Душанбе  ва зерсохторҳои он   доир ба аҳамияти таърихии  ин санади сарнавиштсоз дар рушди мамлакат   бо иштироки коршиносони  соҳа  мулоқоту суҳбатҳо   ва  барномаҳои фарҳангию фароғатӣ  баргузор  мегарданд. Дар ин рӯз ҳамчунин дар боғҳо ва дигар  маконҳои фарҳангию  истироҳатӣ  бо мақсади  дар рӯҳияи идона  ташкил намудани сайру гашти оммавии сокинону меҳмонони пойтахт баргузории барномаҳои фарҳангию фароғатӣ бо иштироки ҳунармандони варзидаи ҷумҳурӣ, намоиши ҳунарҳои мардумӣ ва маҳсулоти кишоварзӣ    дар назар дошта шудааст.