GIZ барои татбиқи лоиҳаи бахши кишоварзӣ дар Тоҷикистон 1,3 миллион евро ҷудо мекунад

ДУШАНБЕ, 01.10.2018 /АМИТ «Ховар»/. Созишномаи амалисозии ҳамкории техникӣ  оид ба татбиқи лоиҳаи  «Гуногунии  биологӣ  ва хизматрасониҳои  экосистемавии минтақаҳои кишоварзӣ» барои  Ҷумҳурии Тоҷикистон  байни Вазорати кишоварзии Ҷумҳурии Тоҷикистон  ва Ҷамъияти Германия оид ба  ҳамкории техникӣ (GIZ) –ро 1 октябр палатаи поёнии Парлумони Тоҷикистон тасдиқ намуд.

Вазири кишоварзии Ҷумҳурии Тоҷикистон     Изатулло  Сатторӣ санади мазкурро дар назди вакилони Парлумон шарҳ дода, гуфт, ки  лоиҳаи  «Гуногунии  биологӣ  ва хизматрасониҳои  экосистемавии минтақаҳои кишоварзӣ» аз ҷониби Ҷамъияти Германия оид ба  ҳамкории техникӣ (GIZ) дар ҳаҷми 1 миллиону 345 евро дар ду ноҳияи  пилотии Тоҷикистон –Рашт ва Айнӣ татбиқ  карда мешавад.  Самти асосии татбиқи лоиҳаи мазкур  ба омӯзиши гуногунии биологӣ ва хизматрасониҳои экосистемавии минтақаҳои кишоварзӣ, хусусан омӯзиш ва нигоҳдошти ниҳолҳои гуногуни мевадиҳанда, ки мутобиқ ба иқлим ва шароити ноҳияҳои пилотист, нигаронида шудааст.

Вазири кишоварзӣ афзуд, ки дар доираи татбиқи лоиҳа, ки то соли 2020 идома меёбад,  ҳамзамон ҷойҳои нави корӣ  фароҳам оварда  шуда, татбиқи лоиҳаи мазкур ба бунёди боғҳои интенсивӣ дар ноҳияҳои пилотӣ мусодат менамояд.