Намояндаи Парлумони Тоҷикистон дар Ассамблеяи Иттиҳоди байнипарлумонӣ иштирок мекунад

ДУШАНБЕ, 13.10.2018/АМИТ «Ховар»/. Пагоҳ дар шаҳри Женеваи Швейтсария Ассамблеяи 139-и Иттиҳоди байнипарлумонӣ /ИБ/   ва ҷаласаи тантанавӣ ба ифтихори  20-умин солгарди таъсиси гурӯҳи геополитикии «Евразия»-Иттиҳоди мазкур доир мегардад. Интизор меравад, ки дар ин ҷаласаҳои тантанавӣ Ҷумҳурии Тоҷикистонро узви гурӯҳи миллии парлумонии Маҷлиси миллии Маҷ­лиси Олии Ҷумҳурии Тоҷикистон дар Иттиҳоди байнипарлумонӣ Наргис Раҳмонова намояндагӣ намояд.

Иттиҳоди байнипарлумонӣ соли 1889 таъсис ёфта, ба ҳайати он 178 кишвари ҷаҳон шомил буда, 12 созмони байналмилалии парлумонӣ мақоми аъзои ассотсиатсияшудаи онро доранд.

Парлумони Ҷумҳурии Тоҷикистон аз соли 1997 узви ин созмони байнипарлумонӣ аст. Мақоми олии Иттиҳод Ассамблея ба ҳисоб меравад, ки дар як сол ду маротиба даъват карда шуда, дар кори он бештар аз 1300-1500 ҳайати парламентҳо ширкат меварзанд. Иттиҳоди байнипарлумонӣ дорои чор кумита: оид ба масъалаҳои сулҳ ва амнияти байналмилалӣ, оид ба рушди устувор, молия ва савдо, доир ба демократия ва ҳуқуқҳои инсон ва оид ба корҳои Созмони Милали Муттаҳид мебошад.

Гурӯҳи геополитикии «Евразия» соли 1998 дар Конфронси 100-уми Иттиҳоди Байнипарлумонӣ дар шаҳри Москва таъсис ёфтааст. Ба он  кишварҳои Арманистон, Беларус, Қазоқистон, Қирғизистон, Молдова, Федератсияи Россия, Тоҷикистон, Туркманистон ва Ӯзбекистон шомиланд.