Вокуниш ба матлаби АМИТ «Ховар» «Зимистони имсола барвақт дар мекӯбад»

ДУШАНБЕ, 13.10.2018 /АМИТ «Ховар»/.  10 октябри соли равон дар сомонаи АМИТ «Ховар» таҳти унвони «ЗИМИСТОНИ ИМСОЛА БАРВАҚТ ДАР МЕКӮБАД. Дар аксар муассисаҳои таълимии шаҳру навоҳии ҷумҳурӣ омодагӣ ба давраи зимистон дар сатҳи паст ба роҳ монда шудааст» маводе ба нашр расид, ки дар он сатҳи пасти омодагии баъзе шаҳру навоҳии мамлакат ба давраи тирамоҳу зимистони имсола бо рақамҳо баён гардида буд.

Дар робита ба ин мавод дирӯз аз номи мудири шуъбаи маорифи ноҳияи Темурмалик Ш. Сатторов ба Агентӣ посух омад, ки дар он чунин гуфта шудааст:

-Шуъбаи маорифи мақомоти иҷроияи ҳокимияти давлатии ноҳияи Темурмалик бо мақсади дар амал татбиқ намудани қарори Ҳукумати Ҷумҳурии Тоҷикистон аз 27 марти соли 2018, №147 «Дар бораи сари вақт омода намудани соҳаҳои иқтисодиёт ва иҷтимоиёти ҷумҳурӣ барои фаъолияти мунтазам ва самарабахш дар давраи тирамоҳу зимистони солҳои 2018-2019» чораҳои зарурӣ андешида, муассисаҳои таълимии ноҳия ба фасли зимистон ҳанӯз аз аввали анҷоми соли таҳсил омодагии ҷиддӣ гирифта, иҷрои саривақтии масъалаи мазкурро зери назорати қатъӣ қарор додаанд.

Дар назди шуъбаи маориф Ситоди махсус ҷиҳати омодагии муассисаҳои таълимӣ ба давраи зимистонгузаронии солҳои 2018-2019 таъсис дода шуд. Тибқи нақшаи зимистонгузаронии имсола, дар 52 муассисаи соҳаи маориф 168 тонна ангишт, 678м3 ҳезум ва 2969 литр сӯзишвории дизелӣ бояд захира карда шуда, 736м² тирезаҳо шишабандӣ мегардиданд.

Сатҳи омодагии муассисаҳои таҳсилоти умумӣ, томактабӣ ва таҳсилоти иловагӣ ба мавсими тирамоҳу зимистони солҳои 2018-2019 хуб буда, то 11 октябри соли 2018-2019 муассисаҳои соҳаи маориф бо 168 тонна ангишт, 678м3 ҳезум ва 2969 литр сӯзишвории дизелӣ таъмин гардида, шишабандии тирезаҳо пурра ба итмом расонида шудааст, ки 100%-и нақшаи пешбинишударо дар бар мегирад. Имсол барои харидорӣ ва захира намудани сӯзишворӣ аз буҷаи мақомоти иҷроияи ҳокимияти давлатии ноҳия 184 111 сомонӣ ҷудо гардида, бо ин маблағ пурра маводи сӯзишворӣ харида шудааст.

Инчунин дар муассисаҳои таълимии ноҳия 532 адад печҳои аловӣ, 38 адад генераторҳои барқӣ ва 201 адад гармкунакҳои барқӣ ба давраи зимистонгузаронӣ омодаанд. Муассисаҳои таълимии №1, 3, 8, 9, 16, 35, 46 ва Мактаб-интернати кӯдакони ятиму бепарастори Танобчӣ бо дегҳои буғӣ гарм карда мешаванд.

Тибқи дастури Вазорати маориф ва илми Ҷумҳурии Тоҷикистон бо мақсади сарфа намудани қувваи барқ ва мақсаднок истифода бурдани маблағҳои буҷетӣ ҷиҳати насб намудани гармкунакҳо ва лампаҳои каммасраф дар тамоми муассисаҳои соҳаи маорифи ноҳия низ тадбирҳои амалӣ андешида шудаанд.