АЛЪАМОН АЗ ҚАЛЛОБОН! Фаррух Ҳалимов, ки худро «милиса», «корманди амният», «прокурор» ва «суд» муаррифӣ мекард, ба даст афтид

ДУШАНБЕ, 30.11.2018. /АМИТ «Ховар»/. Дар натиҷаи гузаронидани тадбирҳои фаврӣ—ҷустуҷӯӣ аз ҷониби кормандони ШВКД дар ноҳияи Ҷаббор Расулови вилояти Суғд сокини шаҳраки Палоси шаҳри Бӯстон Фаррух Ҳалимови 31-сола, сокини шаҳри Бӯстон ба иттиҳоми даст доштан дар 18 ҳолати қаллобӣ ба даст афтодааст. Дар ин бора имрӯз ба АМИТ «Ховар» аз Вазорати корҳои дохилии Ҷумҳурии Тоҷикистон хабар доданд.

Бино ба иттилои манбаъ, муттаҳам пештар чор маротиба ба ҷавобгарӣ кашида шудааст. Ахиран моҳи сентябр ӯро додгоҳи шаҳри Хуҷанд барои қаллобӣ 20 ҳазор сомонӣ ҷарима карда буд.

Ба иттилои тафтишот, Фаррух Ҳалимов танҳо дар моҳи ноябр 18 маротиба мардумфиребӣ кардааст.

«Ҳангоми содир намудани ин аъмоли номатлубаш ӯ худро корманди мақомоти «милитсия», «суд», «прокуратура», «кумитаи давлатии амнияти миллӣ», «нозироти андоз» ва «хадамоти фармасевтии вилояти Суғд» муаррифӣ намуда, аз мағозаву дорухонаҳо ва меҳмонхонаҳо гӯё бар ивази ошкор накардани камбудиҳояшон маблағҳои пулӣ ситонидааст», — омадааст дар иттилоия.

Нисбат ба Фаррух Ҳалимов чораи пешгирӣ дар намуди ҳабс татбиқ карда шуда, тафтиши пешакии парвандаи ҷиноятӣ нисбат ба ӯ аз ҷониби шуъбачаи тафтишотии ШВКД дар ноҳияи Ҷаббор Расулов идома дорад.
Мувофиқи маълумотҳои фаврии дастрасшуда, номбурда дар дигар шаҳру ноҳияҳои вилояти Суғд низ даст ба чунин кирдорҳои номатлуб задааст.

ВКД ҶТ аз шаҳрвандони кишвар хоҳиш намудааст, ки «агар касе аз Фаррух Ҳалимов ҷабр дидааст, ё дар бораи дигар ҷиноятҳои содиркардаи ӯ маълумот дошта бошад, ба ШВКД дар ноҳияи Ҷаббор Расулов муроҷиат намояд».