Ба фарзандони бунёдкорони Неругоҳи барқи обии «Роғун» китобҳо тақдим гардиданд

ДУШАНБЕ, 12.11.2018. /АМИТ «Ховар»/.  Дар арафаи  ба кор даромадани чархаи нахустини Неругоҳи барқи обии «Роғун»  Муассисаи нашриявии «Маориф»-и Вазорати маориф ва илми Ҷумҳурии Тоҷикистон  3 ҳазору 60 нусха  китоби тозанашрро  ба фарзандони коргарони сохтмони Неругоҳи барқи обии «Роғун» тақдим намуд.

Тавре аз Муассисаи нашриявии «Маориф»-и Вазорати маориф ва илми Ҷумҳурии Тоҷикистон ба мухбири АМИТ «Ховар» хабар доданд,   китобҳои мазкур беш аз 50 номгӯй, аз ҷумла «Афсонаҳои халқи тоҷик»,  достонҳои «Шоҳнома»,  «Саргузашти Собир»-и Сотим Улуғзода,    «Озода шав!», «Наврӯзи ҷаҳонафрӯз»,  «Панднома»-и Шайх Аттор,  «Қобуснома»-и  Унсурмаъолии Кайковус,  «Суруду навоҳои дилнишин»,  «Шукуфаҳои сабзи баҳор», «Илҳом аз Шоҳнома»-и Лоиқ Шералӣ, «Боғи момаи Ангур»-и Бозор Собир, «Роғун–кохи нур»-ро ташкил доданд.

Бино ба иттилои манбаъ, ҳамчунин Муассисаи нашриявии «Маориф» тасмим гирифтааст, ки ҳар сари чанд вақт ба китобхонаҳои мактабҳои шаҳри Роғун китобҳои тозанашр  эҳдо намояд.