«ТЕРРОРИЗМ ВА ЭКСТРЕМИЗМ – ҶАҲОЛАТУ ГУМРОҲӢ». Бо чунин унвон китоби нависанда Садриддини Ҳасанзод рӯнамоӣ гардид

ДУШАНБЕ, 27.11.2018. /АМИТ «Ховар»/. Имрӯз дар Вазорати фарҳанги Ҷумҳурии Тоҷикистон китоби «Терроризм ва экстремизм – ҷаҳолату гумроҳӣ»-и нависанда ва рӯзноманигори тоҷик Садриддини Ҳасанзод рӯнамоӣ карда шуд.

Тавре мухбири АМИТ «Ховар» Зарангези ЛАТИФ хабар медиҳад, дар ҷамъомад як зумра олимону донишмандон, адибон, кормандони мақомоти ҳифзи ҳуқуқ, кормандони воситаҳои ахбори омма ва ҷавонону донишҷӯён иштирок доштанд.

Шоир Давлат Сафар иброз дошт, ки таълифи китоби мазкур саривақтист, зеро дар ҷомеаи имрӯза терроризм ҳамчун зуҳуроти хатарзо ба амнияти ҷомеъа ва ҷони инсонҳо таҳдид намуда, қурбониҳои зиёде ба миён овардааст. Ҳарчанд ин вабои аср дар гузашта низ домангири ҷомеъаи инсонӣ буд, вале охири асри ХХ он дар ҳошияи равандҳои ҷаҳонишавӣ бо суръат ташаккул ёфта, ба яке аз хатарҳои мудҳиштарин табдил ёфтааст.

Мавсуф иброз дошт, ки Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон борҳо ин нуктаро таъкид намудаанд, ки «имрӯз терроризм ва экстремизм ҳамчун вабои аср ба амнияти ҷаҳон ва ҳар як сокини сайёра таҳдид карда, барои башарият хатари на камтар аз силоҳи ядроиро ба миён овардааст». Сарвари давлати мо ҳамчун ташаббускори ҳалли масоили глобалӣ аз минбарҳои бонуфузи байналмилалӣ ҷомеаи ҷаҳониро аз пайомадҳои даҳшатбори терроризму ифротгароӣ ҳушдор дода, ҳамагонро ба муборизаи муштарак алайҳи ин зуҳуроти номатлуб даъват намудаанд.

«Дар китоби мазкур низ рукнҳои асосии таълиму тарбияи насли наврас дар рӯҳияи созандагӣ ва садоқат ба музаффариятҳои даврони соҳибистиқлолӣ, моҳияти ибодат ва ибодатгоҳҳо, масъулияти диндорон, омилҳои падид омадани низоъҳои динию мазҳабӣ, пешгирии хурофот, ҷалби ҷавонон ба гурӯҳҳои ифротӣ, танзими расму оини ниёгон, сарфаву сариштакорӣ мавриди таҳлил қарор гирифтаанд»,- афзуд Давлат Сафар.

Мавриди зикр аст, ки дар китоб масъалагузорӣ, ҳалли мавзӯъҳои гузошташуда аз тарафи муаллиф ҷасурона ва ҳирфавӣ ҳаллу фасл шудаанд. Ӯ бо далелҳои муътамад дар доираи ҷаҳонбинии пурвусъат қазияи ба дин гаравидан, печидагиҳои ақидавӣ, бегонапарастиҳои муосиронро, ки тамоюли шиддат гирифтан доранд, ошкор сохта, ҳамагонро аз ин хатар огоҳ сохта, ҷомеаро ба сарҷамъона камар бастан дар тарбияи насли ҷавони кишвар даъват менамояд.

Зикр гардид, ки китоби мазкур дастури хуби таълимӣ буда, имкон медиҳад таълиму тарбия  ва камолоти маънавии насли наврас баланд бардошта шавад.

Тавре муаллифи асар Садриддини Ҳасанзод баён дошт, раванди воқеаҳои ҷаҳони имрӯз шаҳрвандонро водор менамояд, ки даст ба дасти ҳам гузошта, барои ваҳдату якдилӣ ва якпорчагии кишварамон сарҷамъ бошанд. Рисолати ҳар як шаҳрванд аст,  ки ҳушёрии сиёсиро аз даст надода, барои ободии Ватан бо дилу нияти пок заҳмат кашад.

«Маҳз ҳаводису воқеоти кишварҳои ноамн маро водор намуд, ки ба таълифи чунин асар машғул шавам. Хуб мешуд, ки аз ҷониби нависандагони тоҷик таълифи чунин китобҳо зиёдтар шавад. Мақсади таълифи асар  он аст, ки ҷавонон бояд худогоҳ бошанд, дар ҷаҳони пурталотум мавқеи устувори шаҳрвандии худро нигоҳ дошта, дар пешрафт, ободӣ ва суботи мамлакат саҳмгузор бошанд. Зеро тадқиқот муайян намудааст, ки паст будани маърифати сиёсӣ ва надоштани саводи комил сабаби асосии ба ҳизбу ҳаракатҳои ифротӣ ва ҷудоихоҳ шомил гардидани ҷавонон мебошад»,- зикр кард Садриддини Ҳасанзод.