В. ЖИРИНОВСКИЙ: «ДАР ҶУМҲУРИИ ТОҶИКИСТОН ОРОМӢ ҲАМЕША ҲУКМФАРМО ХОҲАД БУД». Сарвари ҲЛДР дар бораи сафари худ мулоҳизаҳояшро дар Фейсбук навиштааст

ДУШАНБЕ, 01.11.2018. /АМИТ «Ховар»/. Ҳайати намояндагони  Думаи давлатии Россия таҳти роҳбарии Раиси Ҳизби либерал-демократии Россия Владимир Жириновский бо сафари дурӯза дар Тоҷикистон қарор дорад.

Меҳмононро дар Фурудгоҳи байналмилалии Душанбе намояндагони палатаи поёнии Парлумони Тоҷикистон таҳти роҳбарии муовини аввали Раиси Маҷлиси намояндагони Маҷлиси Олии Ҷумҳурии Тоҷикистон Абдуҷаббор Азизӣ пешвоз гирифтанд.

Дирӯз В.В. Жириновский дар саҳифаи худ дар Фэйсбук чунин сабт навиштааст:

«Мо бо вакилони ҲЛДР ба Тоҷикистон омадем.

Ҳайати қабулкунанда моро  бо расму оин ва  меҳмоннавозии шарқиёна — нону намак ва рақсу суруди миллӣ истиқбол намуд.

Дар Тоҷикистон оромӣ ҳамеша пойдор хоҳад буд, дар ин ҷо задухӯрдҳои мусаллаҳона чун дар  Афғонистон ва Сурия ба вуқӯъ намеоянд. Мо муносибати некхоҳона бо Ҷумҳурии Тоҷикистонро дастгирӣ менамоем. Ҳамкорӣ ба манфиати ҳамагон аст.

Ман бо раиси Парлумон, профессорону донишҷӯёни Донишгоҳи славянии Россия ва Тоҷикистон мулоқот менмоям. Бо мавзеъҳои таърихии Тоҷикистон шинос хоҳам шуд».   

Ёдовар мешавем, ки дирӯз пас аз нисфирӯзӣ меҳмонон аз шаҳрҳои Ҳисор ва Турсунзода дидан намуданд. Онҳоро муовини аввали Раиси Маҷлиси намояндагони Маҷлиси Олии Ҷумҳурии Тоҷикистон Абдуҷаббор Азизӣ ҳамроҳӣ намуд. Дар шаҳри Турсунзода роҳбари ҲЛДР бо  фаъолияти ширкати алюминии Тоҷикистон шинос гардид ва дар ҳамон ҷо бо ҷамоати русзабонони шаҳри Турсунзода мулоқот намуд. Ба меҳмон китоби академик Бобоҷон Ғафуров «Тоҷикон»-ро  тақдим намуданд.

Сипас Жириновский аз ангурзори деҳқони асил Ҳоҷӣ Неъмат Усмонов дидан намуд. Деҳқонон дар ин ҷо Жириновскийро бо таоми миллии тоҷикон- қурутоб меҳмоннавозӣ карданд, ки ба ӯ хеле писанд омад: ӯ тибқи анъанаи миллӣ  таомро бо даст истеъмол намуд.

Дар меҳмонхонаи маҳаллии «Ширкент» ба хотири сафари Жириновский зиёфат ороста шуд, ки меҳмон зимни он зери таронаҳои русӣ дар иҷрои сарояндагони тоҷик рақсу хурсандӣ кард.

Роҳбари ҲЛДР ба ҳафт нафар хонандагони мактабҳои миёнаи маҳаллӣ, ки баҳри меҳмон рақсҳои миллӣ иҷро намуданд,  корти ташрифот тақдим намуда, ваъда дод, ки баъд аз хатми мактаби миёна  барои дохил шудан дар мактабҳои олии Федератсия Россия мусоидат хоҳад кард.

«Имрӯз, 1 ноябр мулоқоти ҳайати  Думаи давлатии Россия таҳти роҳбарии Владимир Жириновский бо Раиси Маҷлиси намояндагон Шукурҷон Зуҳуров дар  назар аст»,-хабар дод котиби матбуоти Маҷлиси намояндагон Муҳаммадато Султонов.

Бино ба суханҳои ӯ, инчунин 1 ноябр мулоқоти В.Жириновский бо Вазири корҳои хориҷии Тоҷикистон Сироҷиддин Муҳриддин доир хоҳад гашт.

Тавре интизор меравад, рӯзи панҷшанбе ҳайати парлумони Россия аз Осорхонаи миллии Тоҷикистон ва бозори «Меҳргон»-и пойтахт дидан менамояд.