Ба Коллеҷи санъати ба номи Кароматулло Қурбонови шаҳри Кӯлоб мақоми ҷумҳуриявӣ дода шуд

ДУШАНБЕ, 7.12.2018. /АМИТ «Ховар»/. Коллеҷи санъати ба номи Кароматулло Қурбонови шаҳри Кӯлоб мақоми ҷумҳуриявӣ гирифт. Дар ин бора Қарори Ҳукумати Ҷумҳурии Тоҷикистон аз 30 ноябри соли 2018 ба тасвиб расид.

Тавре зимни суҳбат бо мухбири АМИТ «Ховар» сармутахассиси шуъбаи илм ва муассисаҳои таълимии Вазорати фарҳанги Ҷумҳурии Тоҷикистон Абдураззоқ Самиев иброз дошт, Муассисаи давлатии таълимии Коллеҷи санъати шаҳри Кӯлоб ба номи Кароматулло Қурбонов ягона муассисаи таълимии таҳсилоти миёнаи касбии соҳаи санъат дар вилояти Хатлон буда, бо супориши Шӯрои Вазирони РСС Тоҷикистон аз 9 августи соли 1989 ба ҳайси филиали Омӯзишгоҳи мусиқии шаҳри Душанбе таъсис ёфта буд. Бо қарори Шӯрои вакилони халқии шаҳри Кӯлоб аз 16 феврали соли 1993 Омӯзишгоҳи санъати шаҳри Кӯлоб ба номи Кароматулло Қурбонов гузошта шуд.

Бо Қарори Ҳукумати Ҷумҳурии Тоҷикистон аз 2 августи соли 2004 таълимгоҳ мақоми Коллеҷи санъатро доро гашт ва он аз соли 2004 ба ҳайси Коллеҷи санъат фаъолият дорад.

Ба иттилои манбаъ, дар шуъбаҳои рӯзонаи коллеҷ 146 нафар ва дар шуъбаҳои ғоибона 162 нафар донишҷӯён таҳсил менамоянд. Ба донишҷӯён 37 нафар омӯзгорони соҳибихтисос дарс мегӯянд, ки аз онҳо 3 нафар Ҳунарманди шоистаи Ҷумҳурии Тоҷикистон, 12 нафар Аълочиёни фарҳанги Ҷумҳурии Тоҷикистон, 2 нафар Аълочиёни маорифи Ҷумҳурии Тоҷикистон, 2 нафар номзадҳои илм, 2 нафар узви  Иттифоқи композиторони Ҷумҳурии Тоҷикистон ва 1 нафар узви  Иттифоқи рассомони Ҷумҳурии Тоҷикистон мебошанд.

Дар коллеҷи мазкур дар раванди таълим аз рўи ихтисосҳои иҷрокунандаи созӣ, рассомӣ, дирижёри хори халқӣ, фортепиано, сурудхонӣ, китобхонашиносӣ ва китобшиносӣ, эҷодиёти халқ ва дирижёри хори академӣ мутахассисони касбӣ  тайёр  мешаванд.

Омӯзгорони Коллеҷи ҷумҳуриявии санъати шаҳри Кӯлоб ба номи Кароматулло Қурбонов сиёсати давлату Ҳукумати Ҷумҳурии Тоҷикистонро ҳамаҷониба дастгирӣ намуда, баҳри тайёр намудани мутахассисони соҳибтаҷриба тамоми ҷидду ҷаҳдро роҳандозӣ менамоянд.