«Бемории сил табобатшаванда аст»- таҳти чунин унвон миёни рӯзноманигорони ВАО озмун эълон мегардад

 ДУШАНБЕ, 25.12.2018 /АМИТ «Ховар»/. Бо мақсади беҳтар инъикос намудани роҳҳои пешгирӣ ва наҷот аз бемории сил Муассисаи давлатии «Маркази ҷумҳуриявии ташаккули тарзи ҳаёти солим»-и Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва Барномаи USAID дар Тоҷикистон оид ба мубориза бар зидди бемории сил байни рӯзноманигорони ВАО озмун эълон мекунанд.

Ҳадафи асосии озмун баланд бардоштани сатҳи донишу маълумоти аҳолӣ оид ба мавзӯъҳои калидии бемории сил ва мубориза бар зидди он, ташаккул додани таҳаммулпазирӣ, муносибати неку бомасъулият дар ҷомеа нисбат ба беморони сил ва тақвияти муколама дар ҷомеа оид ба масъалаҳои сил мебошад.
Ба озмун барномаҳои телевизионию радиоӣ, маводи дар рӯзномаю маҷаллаҳо ва интернет нашршуда, ки ба масъалаҳои бемории сил дар Тоҷикистон бахшида шудаанд, пешниҳод карда мешаванд.

Нусхаи асл ё рӯнавишти мавод бо нишон додани таърихи нашр, рўзу вақти пахш дар эфир, номи ВАО ва ному насаби муаллиф қабул карда мешавад. Ба озмун маводе, ки аз 1 октябри соли 2018 то 31 марти соли 2019 нашр ва ё пахш шудаанд, қабул шуда, ба маводи дар қолаби жанрҳои таҳлилӣ навишташуда афзалият дода мешавад.

Ба ҳайати ҳакамон намояндагони воситаҳои ахбори омма, коршиносони силшинос, инчунин намояндагони USAID, ки доир ба масъалаҳои сил кор мебаранд, дохиланд.

Маросими супоридани ҷоиза ба ғолибон моҳи апрели соли 2019 муайян шудааст.