БОРИ АВВАЛ ДАР ТАЪРИХИ АВИАТСИЯИ ТОҶИК! «Сомон Эйр» дар масири Душанбе-Шарм-ул-шайхи Миср парвози чартерӣ анҷом дод

ДУШАНБЕ, 31.12.2018 /АМИТ «Ховар»/. Бори  нахуст дар таърихи авиатсияи граждании тоҷик дар остонаи Соли нави мелодии 2019    ширкати ҳавопаймоии  «Сомон Эйр» дар хатсайри Душанбе-Шарм-ул-шайх /Миср/ аввалин парвози  чартерии мустақим  анҷом дод.

Хабарнигори АМИТ «Ховар» иттилоъ медиҳад, ки мусофирони аввалини хатсайри чартерии Душанбе-Шарм-ул-шайхро директори  Агентии авиатсияи граждании назди Ҳукумати Ҷумҳурии Тоҷикистон Икром Субҳонзода, муовини директори ширкати ҳавопаймоии «Сомон Эйр» Сӯҳроб Ҷӯраев ботантана гусел намуданд. Ширкати  сайёҳии «Компас»  фармоишгари  хатсайри чартерии  Душанбе –Шарм-ул-шайх буда,  намояндагии  ширкати мазкурро дар Тоҷикистон  ширкати «Трансавиа Экспресс» бар уҳда дорад.

Бояд тазаккур дод, ки  бори нахуст  бо ҳавопаймои Боинг 737-800  168 нафар мусофир аз Душанбе ба  самти Шарм-ул-шайх сафар карданд. Парвозҳо аз Душанбе ба ин самт дар ҳар  10 рӯз як маротиба иҷро гардида, вақти парвоз аз Душанбе то Шарм-ул-шайх  5 соатро ташкил медиҳад.

Мавриди зикр аст, ки  алҳол ширкати ҳавопаймоии «Сомон Эйр» парвозҳоро аз Тоҷикистон ба кишварҳои Германия, Амороти Муттаҳидаи Араб, Туркия, Чин, Россия, Қазоқистон ва Ӯзбекистон муваффақона анҷом медиҳад. Парки ҳавопаймоии ширкати ҳавопаймоии «Сомон Эйр» аз ҳавопаймоҳои Боинг 737-300, 737-800 ва 737-900 иборат мебошад.