Дар ноҳияи Фирдавсии шаҳри Душанбе иншооти нав бунёд гардид

ДУШАНБЕ, 27.12.2018 /АМИТ «Ховар»/.  27 декабр  бо иштироки Раиси шаҳри Душанбе  Рустами Эмомалӣ  бинои шуъбаи Кумитаи давлатии амнияти миллии Ҷумҳурии Тоҷикистон дар ноҳияи Фирдавсии шаҳри Душанбе, ки бо тарҳи хосса бунёд гардидааст, ба истифода дода шуд.

Тавре аз Раёсати иттилоот ва робитаҳои хориҷии дастгоҳи Раиси шаҳри Душанбе ба АМИТ «Ховар» хабар доданд,  сохтмони иншооти мазкур бо фармоиши Кумитаи давлатии амнияти миллии Ҷумҳурии Тоҷикистон дар асоси қарори Раиси шаҳри Душанбе соли 2017 оғоз гардида, дар як муддати кӯтоҳ мавриди баҳрабардорӣ қарор гирифт.

Лоиҳаи иншооти мазкур аз ҷониби Ҷамъияти саҳомии кушодаи «Корезлоиҳа»-и Кумитаи меъморӣ ва сохтмони назди Ҳукумати Ҷумҳурии Тоҷикистон таҳия гардида, корҳои сохтмон ва васлу насб аз ҷониби ҶДММ «Сабр-Аф» амалӣ гардидаанд.

Маблағи умумии корҳо тақрибан 4 миллион сомониро дар бар гирифтааст.

Иттилоъ дода шуд, ки бинои мазкур аз се ошёна ва болохона иборат буда, дар он баҳри фаъолияти кормандон 7 утоқи корӣ, 8 ҳуҷраи истиқоматии кормандон, иншооти ёрирасони соҳа, бойгонӣ, анбор ва толори варзишӣ мавҷуд мебошанд.

Бинои хуштарҳу замонавӣ дар масоҳати 2100 метри мураббаъ бунёд гардида, дорои шароити беҳтарини фаъолият ва истиқомати кормандон мебошад.

Зимни боздид Раиси шаҳри Душанбе  Рустами Эмомалӣ ба корҳои сохтмонӣ баҳои баланд дода, зикр намуд, ки фароҳам овардани шароити мусоид ба фаъолияти пурзаҳмату шабонарӯзии кормандони амният дар пешгирии  ҷинояткорӣ нақши муҳим  мегузорад.

Дар бинои мазкур  ба кормандони ин ниҳод шароити шоистаи фаъолият муҳайё гардида, утоқҳои корӣ бо мизу курсиҳои муосир, компютер ва дигар лавозимоти замонавӣ таҷҳизонида шуда, ҳуҷраҳои истиқоматӣ бо ҷиҳоз ва  дигар лавозимоти рӯзгор таъмин шудаанд.

Иншооти мазкур бо инобати талаботи муосир бунёд гардида, дар он низоми камераҳои мушоҳидавӣ, огоҳӣ аз сӯхтор ва алоқаи шаҳрӣ таъмин гардидааст.

Ҳамчунин низоми дохилии гармидиҳанда пурра васлу насб гардида, дар сурати гузаронидани қубури магистралӣ дар ин минтақа ба шабакаҳои гармидиҳандаи шаҳри Душанбе пайваст карда мешавад.

Раиси шаҳри Душанбе  Рустами Эмомалӣ дар назди кормандони соҳа сухан гуфта, ҳозиринро бо ҷашни касбии кормандони мақомоти амнияти миллӣ табрику шодбош гуфт. Мавсуф бунёди чунин биноҳои замонавии кориро натиҷаи сиёсати бунёдкоронаи давлату ҳукумат ва эътимоди баланду ғамхориҳои бевоситаи Пешвои миллат ба кормандони ин ниҳоди қудратии кишвар унвон кард.