Дар маҳаллаи «Ҳаёти нав»-и Душанбе Маркази байналмилалии намоишгоҳҳо бунёд карда мешавад

ДУШАНБЕ, 29.01.2019./АМИТ «Ховар»/. Дар маҳаллаи  «Ҳаёти  нав» — и ноҳияи Синои шаҳри Душанбе Маркази байналмилалии намоишгоҳҳо бунёд карда мешавад. Дар ин бора раиси Кумитаи меъморӣ ва сохтмон Ҷамшед Аҳмадзода имрӯз зимни нишасти матбуотӣ иттилоъ дод.

Ба гуфтаи номбурда, Маркази мазкур дорои ду толори калон хоҳад буд, ки масоҳати ҳар яки он 2 ҳазор метри мураббаъро ташкил медиҳад.

Майдони умумии бинои намоишгоҳ 28 ҳазор метри мураббаъро ташкил дода, он бо инобати тамоми шароити мутобиқ ба замони муосир бунёд карда мешавад.

Лоиҳаи бино бо Ҳукумати мамлакат мувофиқа карда шуда, барои пайдо намудани сармоягузор ба идораҳои дахлдор пешниҳод карда шуд.

Бояд гуфт, ки дар доираи Нақшаи генералии шаҳри Душанбе дар ин маҳалла бунёди биноҳои аз 35-40- ошёна боло дар назар дошта шудааст.

Тавре чанде қабл муовини сардори Сарраёсати меъморӣ ва шаҳрсозии шаҳри Душанбе Шодимурод Аловуддинов дар суҳбат бо мухбири АМИТ «Ховар» иттилоъ дод, дар ин мавзеъ бунёди  даҳҳо биноҳои баландошёнаи маъмурӣ дар назар дошта шудааст.