Донишгоҳи давлатии тиббии Тоҷикистон соли 2018 соҳиби 3 медали тилло гардид

ДУШАНБЕ, 29.01.2019 /АМИТ «Ховар»/. Соли 2018 се нафар бонувони ихтироъкори  Донишгоҳи давлатии тиббии Тоҷикистон барои ихтироъ дар соҳаи тиб сазовори медалҳои тилло ва нуқра гардиданд. Дар ин бора имрӯз зимни нишасти матбуотӣ  Ректори Донишгоҳи давлатии тиббии Тоҷикистон Маҳмадшоҳ Гулзода ба хабарнигорон иттилоъ дод.

Ба гуфтаи номбурда, ин се нафар бону дар 11-умин  намоишгоҳ ва Форуми занҳои ихтироъкори ҷаҳон дар шаҳри  Сеули Кореяи Ҷанубӣ штирок намуда, обрӯи Ҷумҳурии Тоҷикистонро баланд бардоштанд.

“Дар Форум номзади илмҳои тиб, мудири кафедраи физиологияи нормалӣ Фариза Ҳалимова барои ихтирои “Тарзи  пешгӯии вайроншавии саломатии репродуктивӣ” соҳиби 2 медали тилло ва 5 сертификат барои ихтироот дар соҳаи тиб  аз ҷониби Ассотсиатсияи ихтироъкорони давлатҳои Гурҷистон, Германия, Македония  ва Индонезияву Таиланд гардид.  Аспиранти  кафедраи кимиёи фармасевтӣ ва заҳршиносӣ Мижгона Шуҳратзода барои ихтирои “Метрарги фаъолияти зиддимикробӣ зоҳиркунанда” соҳиби медали тилло ва аспиранти кафедраи ҷарроҳии умумии №1 Шабнам Муродова барои ихтирои “Тарзи ташхиси лапароскопии дараҷаи долихосигма” соҳиби медали нуқра гардиданд”,-гуфт ректори Донишгоҳи давлатии тиббии Тоҷикистон.

Ба иттилои мавсуф, инчунин соли 2018 Донишгоҳи давлатии тиббии Тоҷикистон ба номи Абӯалӣ ибни Сино  барои корҳои эҷодӣ ва ихтироъкорӣ дар соҳаи тиб бо ҷоизаи  махсус- Ҷом ва шоҳҷоизаи озмуни KIWA сарфароз гардида,  медали тилло ба даст овард.