Олимони Донишгоҳи техникии Тоҷикистон тадқиқотро дар самти илмҳои бунёдӣ бештар ба роҳ мемонанд

ДУШАНБЕ, 29.01.2019. /АМИТ «Ховар»/. Ҳайати олимону муҳаққиқони Донишгоҳи техникии Тоҷикистон тадқиқотро дар самти илмҳои бунёдӣ ва амалӣ роҳандозӣ намуданд. Ин тадқиқот ба ҳалли масъалаҳои ҳалталаби мубрами хоҷагии халқ равона гардида, самтҳои афзалиятноки илм ва рушди иқтисодиёти миллиро фарогир мебошанд. Ин нуктаро  Ректори донишгоҳи мазкур Ҳайдар Одиназода  имрӯз, 29 январ зимни нишасти матбуотӣ дар ҳузури хабарнигорон баён дошт.

«Парки технологии донишгоҳ ҳамчун муассисаи инноватсионӣ бо мақсади рушди илм ва истифодаи самараноки технологияи аълосифат барои қонеъ гардонидани талаботи истеҳсолот дар истифодаи самараноки технологияҳои навтарин ва истеҳсоли маҳсулоти воридотивазкунанда фаъолияти густурдаи худро ба роҳ мондааст», — илова намуд мавсуф.

Зимнан, Сарвари давлат муҳтарам Эмомалӣ Раҳмон зимни ирсоли Паёми худ ба Маҷлиси Олии мамлакат соли 2017 чунин иброз доштанд: «Мо бояд нишондиҳандаҳои таъмини сифатро дар ҳамаи зинаҳои таҳсилот бо стандартҳои ҷаҳонӣ наздик созем, ҳамкории муассисаҳои таҳсилоти миёна ва олии касбиро бо субъектҳои бозори меҳнат густариш бахшем, дараҷаи рушди низоми инноватсияи миллӣ ва нишондиҳандаҳои азхудкунии технологияҳои иттилоотиву коммуникатсиониро беҳтар гардонем».

Ин аст, ки ҳайати олимону устодони Донишгоҳи техникии Тоҷикистон ба номи академик Муҳаммад Осимӣ фаъолияти илмии худро дар самти тадқиқоти илмҳои бунёдӣ сол аз сол бештар менамоянд.

Зикр шуд, ки дар раванди ҷаҳонишавӣ ва рушди илму техника донишгоҳ тасмим гирифтааст озмоишгоҳҳои илмӣ-тадқиқотӣ ва таълимӣ ташкил намояд.

Ёдовар мешавем, ки ин донишгоҳ пойгоҳи асосии омода намудани мутахассисони соҳаи техникию технологии Ҷумҳурии Тоҷикистон буда, дар ҳамаи факултетҳои он аз рӯи зиёда аз 70 ихтисос мутахассисон омода карда мешаванд.