Раддияи Вазорати корҳои дохилӣ: «Иддаои Юлдошева Кибриё Аскаралиевна комилан бардурӯғ мебошад»

ДУШАНБЕ, 31.01.2019. /АМИТ «Ховар»/. Вазорати корҳои дохилии Ҷумҳурии Тоҷикистон  дар иртибот ба хабари бархе сомонаҳо таҳти унвони «Зане, ки иддао дошт милисаҳо ӯро бараҳна карданд, аз Русия паноҳгоҳ хост», ки 25 январи соли 2019 нашр шуд, раддия пешниҳод менамояд.

Дар хабар гуфта мешавад, ки гӯё кормандони ШВКД дар ноҳияи Спитамен шаҳрванд Юлдошева Кибриё Аскаралиевнаро ҳангоми бозпурсӣ бараҳна кардаанд. «Бояд тазаккур дод, ки ин иддао комилан дурӯғ мебошад», — иттилоъ доданд аз Вазорати корҳои дохилии мамлакат ба АМИТ «Ховар».

Вазорат дар идомаи раддияи худ навиштааст, ки «шаҳрванд Юлдошева К.А. ба хотири аз ҷавобгарии ҷиноятӣ саркашӣ намудан бе ягон далел ба кормандони милитсия тӯҳмат намудааст».

Ба иттилои манбаъ, Юлдошева Кибриё Аскаралиевна, соли таваллудаш 1984, сокини ноҳияи Спитамен, ҷамоати Сарбанд, шаҳраки Платина, кӯчаи Абдусаломов, хонаи 12, ҷинояти қаллобӣ содир намудааст.  «7 майи соли 2018 нисбат ба номбурда бо моддаи 247 қисми 3 банди «а» Кодекси ҷиноятии Ҷумҳурии Тоҷикистон парвандаи ҷиноӣ оғоз карда шуда, забонхати ӯ ҷиҳати аз ҷойи истиқомат дур нарафтан гирифта ва парвандаи ҷиноятияш барои баррасӣ ба суди ноҳияи Спитамен ирсол карда шудааст», — хабар  доданд аз Вазорати корҳои дохилии Ҷумҳурии Тоҷикистон.

Вазорат иттилоъ медиҳад, ки «дар вақти марҳилаи судӣ судшаванда Юлдошева К.А. ба суди ноҳияи Спитамен ҳозир нашуда, аз он саркашӣ намудааст. 15 январи соли 2019 аз тарафи суди ноҳияи Спитамен таъйиноти маҷлиси судӣ таъйин гардида, нисбат ба номбурда кофтуков эълон карда шуд.
24 январи соли 2019 аз ҷониби ШВКД дар ноҳияи Спитамен нисбат ба номбурда парвандаи ҷустуҷӯӣ оғоз карда шуда, дар кофтукови байни давлатҳо эълон карда шуд».

«Айни замон барои дастгир намудани ҷустуҷӯшаванда Юлдошева К.А. корҳои фаврӣ-ҷустуҷӯӣ идома доранд», — иттилоъ дод манбаъ.