Раддияи Вазорати корҳои дохилии Ҷумҳурии Тоҷикистон ба иттилои нодурусти сомонаи «Ахбор.cом»

ДУШАНБЕ, 29.01.2019. /АМИТ «Ховар»/. Вазорати корҳои дохилии Ҷумҳурии Тоҷикистон дар робита ба хабари сомонаи «Ахбор.cом», ки гӯё 25 январи соли 2019, тахминан соати 20:00, набераи Сарвазири Тоҷикистон Қоҳир Расулзода бо мошини «Mersedes GL» дар назди як фурӯшгоҳ дар шаҳри Хуҷанд сокини деҳаи Виткони ҷамоати Оббурдони ноҳияи Мастчоҳ Бахтовар Салимовро пахш кардааст, раддия нашр намуд.

Тавре дар раддияи ин вазорат гуфта мешавад, оид ба ҳодисаи мазкур корҳои фаврӣ-тафтишотӣ  гузаронида шуданд.

Ба иттилои Вазорати корҳои дохилӣ, зимни тафтишот муайян гардид, ки садама дар ҳақиқат рух додааст. «Лекин мошини мазкур ба шаҳрванд Раҳмонов Валиҷон Ҳакимович, соли таваллудаш 1996, сокини шаҳри Хуҷанд, кӯчаи Асирӣ, хонаи 81 тааллуқ дорад. Нисбат ба номбурда парвандаи ҷиноятӣ оғоз карда шуда, барои баррасӣ ба суд ирсол гардид», — илова намуд манбаъ.

Дар идомаи раддия чунин гуфта шудааст: «Зимни таҳқиқ муайян карда шуд, ки ронандаи машини мазкур Раҳмонов Валиҷон Ҳакимович ба Сарвазири Ҷумҳурии Тоҷикистон Қоҳир Расулзода ягон муносибати хешу таборӣ надорад».