ҶАЛАСАИ ГУРӮҲИ БАЙНАЛМИЛАЛИИ ТАМОС ОИД БА АФҒОНИСТОН ДАР ЛОНДОН. Дар он Ҷумҳурии Тоҷикистонро сафир Масъуд Халифазода намояндагӣ кард

ДУШАНБЕ, 01.02.2019./АМИТ «Ховар»/. 31 январ дар шаҳри Лондон ҷаласаи навбатии Гурӯҳи байналмилалии тамос оид ба Афғонистон баргузор гардид. Дар ин бора ба АМИТ «Ховар» аз Сафорати Ҷумҳурии Тоҷикистон дар Шоҳигарии Муттаҳидаи Британияи Кабир ва Ирландияи Шимолӣ хабар доданд.

Дар ҷаласаи навбатии Гурӯҳи байналмилалии тамос оид ба Афғонистьон беш аз 90 нафар намояндагони кишварҳои аъзо ва созмонҳои байналмилалӣ ширкат намуданд.Ҷумҳурии Тоҷикистонро дар кори ҷаласаи мазкур Сафири Фавқулода ва Мухтори кишвар дар Шоҳигарии Муттаҳидаи Британияи Кабир ва Ирландияи Шимолӣ Масъуд Халифазода намояндагӣ намуд.

Ӯ бо фармони Президенти Ҷумҳурии Тоҷикистон 18 сентябри соли 2018 ба ин вазифа таъйин шудааст. То он вақт дар вазифаи муовини сардори Раёсати консулгарии Вазорати корҳои хориҷии Ҷумҳурии Тоҷикистон кор мекард.

Хотиррасон менамоем, ки Гурӯҳи байналмилалии тамос оид ба Афғонистон соли 2009 таъсис ёфта, ҳамчун сиғаи махсус ба мақсади ҳамоҳанг намудани ташаббусҳои ҷемеаи байналмилалӣ дар раванди таъмини амну субот ва рушди устувори иқтисодӣ дар Ҷумҳурии Исломии Афғонистон шинохта шудааст. Ба ин гурӯҳ 60 кишвари дунё шомил мебошанд.