«Тайи панҷ соли охир раванди муҳоҷирати меҳнатӣ тадриҷан коҳиш ёфтааст»,- бардошт аз нишасти матбуотии Вазорати меҳнат, муҳоҷират ва шуғли аҳолӣ

ДУШАНБЕ, 07.02.2019./АМИТ«Ховар»/. Дар натиҷаи таҳлилу омӯзиш ва мониторингҳое, ки аз ҷониби мутахассисону  коршиносони вазорат  гузаронида шуд,  маълум гардид, ки  дар ҷумҳурӣ тайи панҷ соли охир раванди муҳоҷирати меҳнатӣ  тадриҷан коҳиш меёбад. Рафти муҳоҷирати меҳнатӣ  соли 2018 дар  муқоиса  ба ҳамин давраи соли 2017  3 ҳазору 581  нафар (ё 1%) ва нисбат ба соли 2013  315 ҳазору 522 нафар (ё 39,5%) камтар шудааст. Бозгашти муҳоҷирони меҳнатӣ ба Ватан соли 2018  424 ҳазору 490 нафарро ташкил дод, ки аз хусусияти мавсимӣ доштани муҳоҷирати меҳнатӣ дар Тоҷикистон дарак медиҳад.

Аз натиҷаи татқиқоти сотсиологие, ки байни муҳоҷирони меҳнатӣ–шаҳрвандони Ҷумҳурии Тоҷикистон гузаронида шуд, маълум мегардад, ки  вазъи будубош ва  фаъолияти муҳоҷирони тоҷик дар Федератсияи Россия, ки кишвари асосии қабулкунандаи муҳоҷирони меҳнатӣ аз Тоҷикистон маҳсуб мешавад, дар муқоиса ба солҳои пешин беҳтар мегардад. Ин нуктаро муовини якуми Вазири меҳнат, муҳоҷират ва шуғли аҳолии Ҷумҳурии Тоҷикистон Эмин Сангинзода имрӯз зимни нишасти матбуотии ин ниҳод зикр намуд.

Хамчунин муовини Вазири меҳнат, муҳоҷират ва шуғли аҳолии Ҷумҳурии Тоҷикистон Нурулло Маҳмадулозода иброз дошт, ки  яке аз сабабҳои коҳиши  раванди муҳоҷирати меҳнатӣ –ин дар мамлакат таъсис додани ҷойҳои нави корӣ ва ба шуғл фаро гирифтани аҳолист, ки яке аз самтҳои афзалиятнок дар ин самт маҳсуб меёбад. Ба иттилои номбурда, ҳамкорӣ бо  давлатҳои асосии  қабулкунандаи муҳоҷирони меҳнатӣ, аз ҷумла бо Федератсияи Россия  ва Ҷумҳурии Қазоқистон  тақвият ёфта, соли 2018 масъалаҳои марбут ба ҷанбаҳои мухталифи муҳоҷирати меҳнатӣ бо ин кишварҳо дар 7 ҷаласаву вохўриҳо, нишастҳои сатҳи баланд ва гурўҳҳои кориву коршиносон баррасӣ  гардиданд.

«Масъалаи дигари ин самт дар дохили кишвар бо ҷойи кор таъмин намудани муҳоҷирони меҳнатӣ — шаҳрвандони Ҷумҳурии Тоҷикистон мебошад, ки воридшавиашон ба муддати муайян ба Федератсияи Россия манъ гардидааст. Бо назардошти ин аз ҷониби вазорат дар шаҳру ноҳияҳои ҷумҳурӣ ва ширкатҳое, ки иҷозатнома барои ҷалби қувваи кории хориҷӣ ба ҷумҳурӣ доранд, 13 ҳазору 628 нафар чунин шаҳрвандон  бо ҷойҳои корӣ дар дохили кишвар таъмин карда шуданд»,-  афзуд Н.Маҳмадуллозода.