Дар Донишгоҳи давлатии дӯстии халқҳо дар шаҳри Москва намоиши «Хони наврӯзӣ» баргузор гардид

ДУШАНБЕ, 20.03.2019 /АМИТ «Ховар»/. Бахшида ба ҷашни Наврӯзи байналмилалӣ  дар Донишгоҳи давлатии дӯстии халқҳо дар шаҳри Москваи Федератсияи Россия намоиши наврӯзии донишҷӯёни Тоҷикистон ва давлатҳои ҳавзаи Наврӯз доир гардид.

Тавре  роҳбари маҳфили «Ҷавонони дар хориҷи кишвар таҳсилдошта»-и Кумитаи кор бо ҷавонон ва варзиши назди Ҳукумати Ҷумҳурии Тоҷикистон Каримҷон Салимзода  ба АМИТ «Ховар» иттилоъ дод, аз ҷониби донишҷӯёни донишгоҳ намоиши дастархони «Хони наврӯзӣ» ба намоиш гузошта шуд. Шумораи зиёди донишҷӯён ва профессорону устодон аз он дидан намуда, ба ташкилкунандагон баҳои баланд доданд.

Ҳамчунин 21 марти соли 2019 дар толори фарҳангии Донишгоҳ аз ҷониби аъзои маҳфил корнсерти идона баргузор карда мешавад.

Ба иттилои манбаъ, дар доираи тантанаҳои наврӯзӣ аз ҷониби маҳфили «Ҷавонони дар хориҷи кишвар таҳсилдошта» дар якҷоягӣ бо ҷамъиятҳои тоҷик, муассисаҳои давлатию ғайридавлатӣ ва муассисаҳои таҳсилоти олии ҳудуди Федератсияи Россия: Москва, Пенза, Новосибиркс, Санкт–Петербург ҷашни байналмилалии Наврӯз дар сатҳи баланд доир карда мешавад.

Ҳамчунин  Наврӯз дар Ҷумҳурии Туркия, Индонезия, Малайзия, Беларус ва Ҷумҳурии Мардумии Чин таҷлил шуда, дар онҳо иштироки  донишҷӯёни дар хориҷи мамлакат таҳсилдошта, тоҷикони муқимӣ ва дӯстдорону ҳаводори фарҳанги миллати тоҷик дар назар аст.