Пешвои миллат Эмомалӣ Раҳмон бо фаъолияти хоҷагии ёрирасони ҶДММ Осоишгоҳи «Баҳористон» шинос шуданд

ДУШАНБЕ, 31.03.2019 /АМИТ «Ховар»/. 31 марти соли 2019 дар доираи сафари корӣ дар вилояти Суғд Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ноҳияи Бобоҷон Ғафуров бо фаъолияти коргарони Хоҷагии ёрирасони Ҷамъияти дорои масъулияти маҳдуди Осоишгоҳи “Баҳористон” шинос шуданд.

Масоҳати умумии заминҳои хоҷагии ёрирасон 4 гектарро ташкил дода, дар он коргарон ба чорводорӣ, паррандапарварӣ, зироаткорӣ, боғдорӣ ва гулпарварӣ машғуланд.

Дар фермаи хурди хоҷагӣ говҳои ширдеҳ, мурғи тухмдиҳанда, ҷуҷаи бройлерӣ барои гушт ва харгуш нигоҳ дошта мешавад.

Дар гармхонаҳо бошад, ниҳолҳои лиму, сабзавот ва гулҳои мавсимии гуногун парвариш меёбад. Гулҳои мухталифи ороишӣ барои тозагии муҳити атроф ва сабзу хуррам гардонидани кӯчаю хиёбонҳо ва боғҳои фарҳангию фароғатии шаҳри Душанбе парвариш карда мешавад.

Бо насби технологияи муосири коркарди маҳсулоти кишоварзӣ дар хоҷагии ёрирасони Ҷамъияти дорои масъулияти маҳдуди Осоишгоҳи “Баҳористон” консерваҳои гуногуни сабзавот, афшураи меваҷот, шириниҳо, шир, ҷурғот, панир ва қаймоқ истеҳсол карда мешавад.

Дар ҳудуди хоҷагӣ ба Сарвари давлат ҳамаи маводи ғизоии дар хоҷагии ёрирасони осоишгоҳ истеҳсолшаванда муаррифӣ гардид.

Тавре маълум шуд, барои ба истироҳаткунандагон пешкаш кардани ғизои солим ва босифату хуштамъи табиӣ маводи ниёзи аввал дар худи хоҷагии ёрирасон тайёр карда мешавад.

Саҳми Осоишгоҳи “Баҳористон” дар солҳои 2019-2021 “Солҳои рушди деҳот, сайёҳӣ ва ҳунарҳои мардумӣ” ҳамчун иншооти муосир ва муаррификунандаи санъату маданияти баланди меҳмондорию меҳмоннавозии тоҷикона хеле назаррас аст.

Тавре роҳбарияти Осоишгоҳи “Баҳористон” иттилоъ доданд, солҳои охир шумораи сайёҳони дохилию хориҷӣ, ки барои истироҳату табобат ин ҷойро интихоб кардаанд, ру ба афзоиш мебошад.

Роҳбарияти осоишгоҳ барои боз ҳам зебову дилкаш кардан ва баҳри ҷалби ҳарчи бештари мизоҷон аз тамоми имкониятҳо ва табиати дилфиреби ин мавзеъ самаранок истифода мебаранд.

Кормандони осоишгоҳ давоми фаъолияти пурсамар ҳамчунин аз ҳисоби даромади софи худ ба дигар корҳои ободонӣ, ҷароғонкунӣ, шинонидани гулу буттаҳо ва дарахтони ороишӣ ин мавзеъро ба як баҳористони ҳақиқӣ табдил додаанд.

Мавриди зикр аст, ки Осоишгоҳи “Баҳористон” соли 2011 бо дастури бевоситаи Сарвари давлат бунёд шуда, имрӯз ба як макони сайру саёҳат ва истироҳату табобати мардум табдил ёфтааст.

Баъди шиносоӣ Президенти мамлакат муҳтарам Эмомалӣ Раҳмон ба роҳбарияти осоишгоҳ барои иҷрои корҳои ободонӣ баҳои арзанда дода, онҳоро ба идомаи ин тадбирҳои нек ҳидоят карданд.