Агентии обуҳавошиносӣ огоҳ мекунад: 30 апрел дар Тоҷикистон борони шиддатнок меборад

ДУШАНБЕ, 29.04.2019 /АМИТ «Ховар»/. 30 апрел дар ҷумҳурӣ ҳавои ноустувор шуда, боридани  борони бошиддат дар назар аст. Дар ин бора аз Агентии обуҳавошиносии  Кумитаи ҳифзи муҳити зисти назди Ҳукумати Ҷумҳурии Тоҷикистон ба АМИТ «Ховар» хабар доданд.

Бино ба иттилои манбаъ,   шабонарӯзи наздик дар доманакӯҳҳои вилояти Хатлон, ноҳияҳои тобеи марказ ва ноҳияҳои ғарбии ВМКБ боронҳои  бошиддат борида, раъду барқ ба амал меояд.    Боридани  жола низ  дар назар  дошта шудааст.

Рӯзҳои 29-30 апрел  бар асари боридани боронҳои шиддатнок дар дарёҳои Ёхсу, Қизилсу (ҷанубӣ) ва аз нишебиҳои қаторкӯҳҳои Ҳисор ҷоришаванда баландшавии сатҳи об пешгӯӣ мешавад. Ҳамчунин дар ноҳияҳои кўҳӣ ва доманакўҳии ҷумҳурӣ эҳтимолияти фаромадани сел дар назар аст.